House leader berin House zahawmna a humhim zo lo – MNF

House leader berin House
zahawmna a humhim zo lo
– MNF
Assembly House-a thil a sawi duh dan leh a tawngkamah chief minister, House leader Pu Lalduhoma chuan House zahawmna humhim kawngah a mawhphurhna a hre loa, a hum him lo niin MNF party chuan an sawi.
MNF Gen. Hqrs. thuchhuak chuan, Budget Session kal mekah March 3-a Mizoram Youth Commission Bill sawiho a nih laia chief minister, House leader ni bawkin MYC din leh a kalpui dan awm tawh chu hman chhunzawm tlak loh leh sawrkar kal tawhten anmahni inhaivurna tura din leh kalpui anga a sawi mai duh chu demawm a tih thu a sawi a. Heng bill hi sawiho leh pass a nih lai pawha MLA ni ve reng, a hunlaia engmah sawi lo, tuna a chhe ber anga a chhuah duh chu rilru hrisel lo a nih zia pholangtu ah an ngai tih a sawi.
‘Sawrkar kal tawhte a chhe thei ang ber leh ram roreltu mipuiin an thlanchhuah tawhte zahpah hauh loa a diriam duh mai kha kan ram hruaitu lu ber tih turah kan ngai loa, House zahawmna leh hruaitu kaltate zahawmna hum tur berin a mawhphurhna hre loa thianghlim ber leh tha ber anga a intarlang duh mai kha mi pangngai tih turah kan ngai lo,’ a ti.
Dan siamthat, belh ngai belh leh paih then ngai paih then chu thil kalphung, a hunlai mil zela mamawh leh tul anga dan chu siam a, hman a ni thin tih MNF hian sawiin, siamthat mai ni lo, a hlui hnawl a, a thar siam duhna rilru kha tak a lo lang tih a sawi.
‘House leader ber thusawi, House kalphung lo lutuk dodalna leh House zahawmna hum tura opposition MLA-ten huaisen taka bill an pass pui lo ngam kha chhuanawm kan ti a. House leader hian hetiang thil zahpuiawm tak hi ching nawn tawh lo se kan duh,’ a ti.
Budget Session kal mekah sawrkar venpui leh khalhngil kawnga opposition MLA-te thawhrimna leh an hriatna hman kawnga an chetdan chu ropui an tiin, ram tana thil tha thlen tur leh khua leh tuite hamthatna tura an auchhuahna fakawm an tih thu a sawi bawk.