HPC-D mi pathum man

Mizoram Police chuan tunhnai khan Kolasib district Saipumah NEEPCO/ Tuirial Hydel Project leh Mauchar khaw inkar kawnga hnamdang sumdawng hnen atanga pawisa chhuhsak kaihhnawihah mi pathum an man a, hel pawl – HPC-D cadre (Lalhmingthanga Sanate faction) nia sawi an ni.
CID (SB) hnuaia Special Operation Team chuan heng mi pathum hi manin, Lalzarzova (47) Mauchar, HPC-D cadre (Lalhmingthanga Sanate faction) leh Lalmuankima (34) Mauchar, Aizawl district leh Lalropianga (38) Thingpuikual Manipur te an man a, Sakawrdai Police Station-ah an lakah thubuai ziahluh a ni.
2021 March 20 khan Excise & Narcotics-a thawkten tuna police-in an man tak Lalzarzova hnen atang hian heroin gram 324 chu Ralbawm ram, Kolasib district Bukpui atanga km. 8 vela hlaah an man a, ND&PS Act hnuaiah thubuai siamsak niin, a hriselna a that loh vangin court-in bail-in 2021 September 15 khan lung in atangin a chhuahtir a. He case-ah hian kumin April 8 khan Kolasib Fast Track Court chuan hremna tichhuakin, kum 10 lung ina tang tur leh cheng nuai khat chawi turin a ti tih an sawi a ni.