HPC Fight Night-ah Filipino boxer leh Mizo fighter innuai dawn

HPC Fight Night-ah Filipino boxer leh Mizo fighter innuai dawn
Tun dinhmuna Mizo boxer tha ber ang hiala ngaih hmachhawn turin India-ah a vawikhatna’n Bryan James Wild a inhnek dawn a, Lungleiah Leitlangpui tlangval Laldinsanga nen bantamweight huangah round 8 innuai turin inremna an siam.
K. Liantluanga Indoor, Pukpuiah April ni 24 leh 25, zan hnih awhin inhnek vawi 10 a awm dawn a, professional inhnek vawi ruk awm tur zingah Mizo boxer pali zinga pathumin anmahni aia pro boxing-a inhnek hnem tawh hnam dang an inhnekpui ang.
Zan hnuhnung zawk inhnekpui berah WBC Youth bantamweight world champion Dinsanga’n pro boxing a luhchilh atanga vawi 11 chak zawn tumin Filipino fighter a hmachhawn dawn a; a hmaa ding tur kum 23 mi Wild hian pro boxing vawi 15 khel tawhin Lunglei tlangval aiin vawi ngain a inhnek tam a, tum 12 chakin vawi hnih a tlawm a, mi pakhat nen an inhnehtawk a ni.
February ni 25 kha Dinsanga inhnek hnuhnun ber niin Bangkok-ah awlsam takin Sarawut Jiamthong a hneh a, world title pangngai chuh a tumna kawngah rahbi tuk mekin Wild a hneh a nih chuan ni ruk hnu, May 1 khian Dubai-ah Chinese boxer Guiming Li nena inhnek zui leh nghal turin a promoter-ten ruahmanna an siam lawk.
Zan hnuhnung zawk zirtawpni zanah hian featherweight huangah round ruk turin Omega Lalramdina leh Vinod Vanteddu a inhnek dawn a; lightweight-ah round li turin Cherhlun fighter C. Lalhruaitluanga’n Remruata a hmachhawn bawk ang.
2024 LPS Pro Fight-ah Omega a chetha chho hle a, bantamweight title fight-ah erawh Dinsanga a hneh zo lo. Chutih rualin August 23, 2023 kha pro boxing a khelh hnuhnun ber ni a ni a, tum hnih a inlan tawhah chak ve vein a inhnekpui tur Vanteddu erawh pro boxing vawi riat khel tawhin tum nga a chak a, vawi hnih tlawmin tum khat a inhnehtawk a, Omega tan fiahna a tling ang.
April ni 24, zan hmasa zawkah F Lalthanliana Junior chuan middleweight-ah Yuvraj Singh a inhnekpui dawn a, LPS Pro Fight champion Electric Veng Lunglei boxer hi pro boxing huangah vawi khat chiah a la inlan a, 2023 Pro Fight title fight-ah C Lalhruaitluanga a hneh lo.
A hmaa ding tur Yuvraj erawh tum nga inhnek tawhin vawi li a chak a, knockout-in tum thum a hneh tel a, tum khat tlawm tawhin lightheavy huanga khel thin niin Leitlangpui tlangval nen round ruk inhnek tura tih an ni.
Zan hmasa zawk inhnekpui berah WBC India champion Vanlalawmpuia leh Praveen M an intawng dawn a, lightweight huangah round riat tura ruahman a ni. Mizo zinga pro boxing khel tam ber Awpa hi tum 16 a inhnekna tur a ni a, vawi 11 chak tawhin tum thum a tlawm a, vawi khat inhnehtawkin a inhnek hnuhnun vawi ngaah a chak zawn mek.
A tum kua nan Praveen chuan pro boxing a khel ve thung dawn a, a inhnek tawhah tum ruk chakin knockout hmangin vawi li hnehna a chang a, vawi khat tlawmin vawi khat tho an inhnehtawk.
Flyweight-ah round li turin LPS Pro Fight title fight-a vawi hnih inlan tawh Vanlalenkawltira leh Lalchhanhima an innuai dawn bawk a, pro boxing-ah a vawi khat nan Enkawla’n chak a tum hle.
Zan hnih chhung hian professional ni lo inhnek pali zeh tel a ni dawn a; flyweight-ah Hmingdailova leh Allison Lalhmangaiha, lightweight-ah Lalnunthara leh Sebastian, welterweight-ah John Lalhunlawma leh Erik Lalthangkima, heavyweight-ah Frankie leh Lalhriattira an innuai ang.