Ltka, Mission Veng
-- Advertisement --
Tunlai hian Lengpui Airport IAF kuta hlan tumna thawm a rik bakah, Power Minister-in Tuirial HEP chungchang a sawi nawi leh deuh a. Tlem ka han sawipui ve teh ang.
Kum 2016 (?) khan kan MLA Lt Col.Zosangzuala khan bus fare min pe a, Congress unit khan Tuirial HEP kha a hmunah kan zuk tlawh tak asin. An la peih lo deuh a, tunhnu hian tlawh leh a chakawm ngawt mai.
Kan ram hi a naupangin kan hnufual em em a. Motor lut hmasa ber, 1944 a kan vengpa, Pu Rochhingan Aizawl a rawn khalh luh kum te khan, Gauhati – Shillong – Silchar te khu National Highway a lo ni daih tawh a.
Tin, kan hruaitu hmasate kha an ropui hle hlawmin ka hria. UT kan nih kum 1972 atangin mahni sawrkar kan nei ve chauh a. Ka hriat reng chu, 1985 UT sawrkar-ah khan Pu R Thangliana kha Supply Minister a ni a. May thla khan Delhi ah, furpui a buhfai qouta dil belh turin a kal a, Mt 2000 a rawn hmuh belh a, kan lawm hle a ni. A lo haw tukah, a inah kan leng a, a titi ka la hriat reng ka han sawi teh ang…
“…Fur a nasa dawn si a, buhfai quota kan hmuh belh loh chuan kan mite thingtlang khuaa a tam zawk an tam ngei dawn tih kan hre si. Delhi-a kan liason officer nen Minister kan va hmu a, chumi chu hmu rawh u…ti reng rengin khawlumah kan vak kual a. Tlai lam dar 5 velah, Jt. Secy pakhat kan va hmu a, kan dil angin, July-Aug quota atan Metric ton 2000 min pe ta a. Lawm em emin Mizoram House kan thleng a. Trunk call kan book a, Aizawl lam kan hrilh nghal a, nangni lah in lo lawm. Chanchinbuah kan chhuahtir dawn in lo ti.. A tuk zing kan han tho a. Dar 9 a lo ri a, khawlum hnuaiah suit ha in, necktie kan han awrh a, Minister pangngai hnen a, “Ka pu, nimin a buhfai quota min pek kha kan lawm teh asin. Kan mite pawh an lawm…mahse…ih. …kan miten a leina tur an nei lo.. chuvangin buhfai leina an neih theih nan, EGS (tam inhlawhna kan tih mai thin) ah kan mite inhlawhna tur pawisa min pe leh hram rawh u aw..”…ti tura han chhuah leh chu…huphurhawm ngang ngang tak a ni, Mizopa tan chuan…mahse kan mite riltama an thih dawn ai chuan..kal chhuak lo thei kan ni si lo….”. …a tih kha ka hre reng thin.
Hemi ka han sawi chhan chu, tunlai thangthar te hian, tuna kan ram hmasawnna zawng zawng hi amaha lo awm mai a ni lo tih an hriat hi tul hlein ka hria a ni. ZMC, Airport leh Tuirial HEP te hi hruaitu hmasaten, awlsam taka an siam a ni lo. Lengpui Airport ngat phei hi chu, khatihlaia kan Finance Minister kha Mission vengpa Zofate zinga pa rintlaka an sawi, Pu J Lalsangzuala ni lo midang ni ta sela, (midang a thawhpui ten beng lo chhu ngawng sela) a hlawhtling kher ange maw chu ka ti hial a ni. A bul tanna kum 1995 tawp lamah thalai min hruai a, tlang bawk te te, ruam leh thing leh mau hmun kan thlir a, Airport mitthla thiam kha a har teh asin. An zawhfel hnu kum 1998 tira kan zuk tlawh kha chuan, mumang ang mai a ni. Harsatna kha a challenge kim vek a ni ber e. Tuna kan sawrkarin IAF etc. te pek a tum tihte hi hre pha se engtin ngai ang maw…ka ti thin.
Kan ram timawitu leh ti zahawmtu, awm lo ata awma siam thei an awm chuan enkawlzui chu harsa lutuk tur em maw ni dawn le…ka ti thin. Tuirial HEP te pawh hi, hruaitu hmasa ten an theih leh phak tawka an lo din, uluk leh fel zawka enkawl tum tak aruang a, a fel lohna lai zawnchhuah a, kal hmasate dem nan hmanrua a hman hi a hrisel lo ngawt mai. Heng kan assets hi chhuanlam engemaw siama ram pawn lam mite enkawl tura pek tum hi hriatthiam a har a ni.
Kan ram hruaitu hmasate hian tihfel tawk loh te, kum a lo vei a siam that ngaite alo awm ngei ang, khawvel dan a ni. Chungte chu sawrkar lokal zelte enkawl zui tur a ni dawn lawm ni?
Chutih ahneka, heng kan ram chhunga thil kumhlun, Assets, kan neihchhun te hi, hnamdang, hausak belhna zawnga vak ruaiho kutah hian tlu lut lo hram se ram tan a va tha em aw.