HSLC 2026 Result

Kumin February leh March chhunga High School Leaving Certificate Exam 2026 result chu niminah tih chhuah a ni a, zirlai za zela 80.31 (80.31%) an hlawhtling.
Mizoram HSLC result that ber tum kha Covid-19 lai, 2021 kum kha a ni a; khami tuma result kha 82.43% a ni. Tunah hian 80.31% a ni leh ta a, Mizoram matric result-a 80% chin a thlen vawihnihna a ni. Kum 2021 hma lama result that ber tum kha 2012 kum a ni a, 72.27% a ni bawk.
Tun tum result bu tihchhuah dan hi, education minister-in a lo puan lawk tawh angin, zirlai ti tha zual (top 10) leh zirlai pass-te division leh letter hmuh dan tihlan a ni ta lo a. Hemi chungchangah hian MBSE chairman chuan, school leh zirlaiten result tha neihna atan ngawta by-heart system leh text book rinchhana zirlaite pass thatna tur ngawr ngawr an thlirpui nia lang chuan, zirlaite zirna sang zawk zir tura state dang nen inelnaah nghawng a nei a, kan hniam phah niin a lang tiin a lo sawi tawh bawk.
Hei hi a dikna chin a awm thei ang a, chutih rualin, ‘by heart’ ngawr ngawr hnualsuat nana hman erawh thil tha lo tak a nih theihna tur chhan tam tak a awm thei bawk ang. Entir nan, by heart bik tur heng formula leh laws hrang hrangte, mithiam bikte thusawi, an sawi ang diak diaka ziah chhuah ngai ang chi te leh thildang tam tak pawh a awm ang. A pawimawh zawk nia lang chu kan inzirtir dan (teaching & learning method) zawk hi niin a lang. Exam result tih that tum ngawr ngawrna ang chia inzirtir a awm thei a, ‘bazar note’ leh ‘exam question’-a innghah ang chi hian zirlaiteah thiamna tluantling tak tak (in-depth knowledge) a tuh lova, hriatna pawnlang (surface knowledge) bak an puakchhuah a beiseiawm fahran lo a ni.
Tun tum result-ah hian Management wise-a thlirnaah, hma lam an pan vek hi thil lawmawm leh chhinchhiah tlak tak a ni bawk. A bikin, sawrkar enkawl sikul result hi a sang zawngin a la chho zel a, zirlai zawng zawng fail vekna sikul zingah sawrkar sikul a tel ta lo te pawh hi chanchin lawmawm tak a ni. A nihna takah chuan, sawrkar sikul-te hi a enga kimah changtlung zawk an ni a. Infrastructure lamah ni se, private aia changtlung zawk, zirtirtu ni se, trained vek an ni a, hlawh thuah lah, private teacher-te hlawh let li let nga hlawh an ni a, hamthatna dang tam tak sawrkar atangin an la dawng bawk. Chutianga enkawl sikulte hi chuan result hi nei tha ber awm an ni a, mahse an nei chhe ber zel bawk si; result nei tha ber thei turin han tang sauh sauh teh se.
Tin, HSLC result pumpui thlirin, 2022 kuma result a tlakhniam thut hnuah, tlahniam chhunzawm lovin chung lamah kan lawn chho leh ngar ngar thei a, 80% chung lam kan han thleng chho leh ta hi a lawmawm a. Chutih rual erawh chuan, result percentage a san zel rual hian zirna quality pawh hi sang tel ve zel thei se, chutiang tur chuan education department hi han tang sauh sauh teh se. Result tha a lawmawm e.