HSLC Exam 2025 Result

Kuminah HSLC exam result tha tak kan nei leh ta; a lawmawm hle. Chutih rualin, kum 20 chhunga HSLC result hi han thlir ila, a khat mawi tawka ‘tlak thut’ leh ‘san thut’ tum (fluctuation) hi a thleng thin. Hei hi zirna lama kan mithiam academician-te hian eng tin nge an ngaih tih hi thil hriat chakawm tak a ni awm e.
Entirnan: 2006 atanga 2012 thleng kha pass percentage a sang zawngin a chho ngar ngar (40.49—72.27) a, kum 2013-ah chuan 58.63%-ah a tla leh duai a. A kum leh 2014 atangin 2018 thleng a sang chho leh ngar ngar a, 2018 hian result san ber tum (76.65%) a thleng a, mahse a kum leh chiah 2019-ah chuan 67.93% ah a tla leh nghal a. Heta tang hian a lawn chho leh a, 2021-ah phei chuan 82.43% (Mizoram record) a ni ta dawrh a, a kum leh 2022-ah a tla leh dawrh a, chuta tang chuan hei tun thleng hian a lawn chho leh ngar ngar a, tun hi kan thleng ta a ni.
Result ‘chhuk-chhoh’ dan kalphung han en hi chuan, ‘tlak thut’ hi kan hnaih leh tan dawn a ang riau mai a. Hetianga ‘tlak thut’ a awm thin hi a chhan hriat chhuah tum a, chu chu siam that dan ngaihtuah a pawimawh hmel ta riau a ni.
Hetih lai hian, thil pakhat lawmawm angreng tak chu, tunhmaa merit list-a hnamdang hming lang teuh thin ang kha a awm ta lo (racial thil ni lovin) a; kan thalaiten tan an la ve zel te pawh a tih theih ang a. Chutih rualin, tunhmaa merit list-a mipa lang mang lo thin pawh kha, tunah chuan mipa lam an rawn lang tam chho ve leh ta deuh. A pumpui thuah erawh, Second Div atanga Distinction thlengin hmeichhia an tam zawk zel a, Third Division-ah mipa an tam zawk ziah bawk.
Exam Result hi zirna a that leh that loh tehkhawng atana kan hman rim deuh ber a nih avangin a pawimawh hle a, result nei tha school atanga zir chhuakte chu an induh deuh larh thin a, result tha vak lo atanga zirchhuakte pawhin an en dan a dang deuh nge nge thin. Chutih laiin teaching method leh learning method kan kalpui dan hian kawngro a su thui hle a. Tuna kan kalphung lar tak ‘by-heart’ system hi chuan zirlaiteah thiamna leh hriatna tluantling tak tak hi a pe pha lo em ni ang tihtur a ni a. Learning by-heart hmangin exam-naah mark sang tak tak a hmuh theih, chutih laiin mark sang tak a hmuhna subject kha zirlai chuan a takin a chhawr thiam lo thei a; vaki tawng thei an sawi ang chauhah hian kan inchhuah thei a ni. Chutiang quality nei zirlai chuan a zir sang tual tual a, hriatna leh thiamna tluantling tak tak nei si lovin eng eng emaw degree chu a nei ve thei zel; mahse, chu chu a hna zawnnaah a hmang tangkai thei leh si lo thin a ni. Hetiang quality nei hi tuna kan zirlai zingah hian tam tak an awm thei a ni.
Result tha hi a lawmawm e, chutih rualin algebra formula by-heart teuh, ziah chhuah a tul huna ziak chhuak ve thei zel, mark pawh sang tak hmu thei, mahse hman tangkai huna hmang tangkai leh thiam si lo ang hi kan inchhuah teuh loh nan, kan inenfiah zeuh zeuh hi chu a tul dawn niin a lang e.