HSS zirlai tan NEDFi thawhpui

Mizoram School Education department leh North-eastern Education Development Finance Corperation Ltd (NEDFi) chuan Nilaini khan Aizawlah thawhdunna thuthlung an ziak. Thawhdunna thuthlung hi ‘Advancing North East Initiative for Career Mentoring of Students’ hnuaia ziah a ni.
Thawhhona thuthlung ziah hmanpuitu School Education minister Dr Vanlalthlana chuan department leh NEDFi thawhdunna chu Mizoram zirna atan rahbi pawimawh tak a ni, tiin, thawhhona chuan Mizorama zirlaite tan hma hun eng zawk a thlen bakah thalaite tan beiseina thar a thlen ngei a ring tih a sawi.
NEDFi hotute chuan Advancing North-east Initiative leh a kaihhruai dan (student mentoring) chungchang an sawifiah a. Thawhdunna thuthlung hi Mizoram aiawhin Samagra Siksha state project director, School Education director Lalsangliana leh NEDFi aiawhin executive director SK Baruah ten hming an ziah hnan a ni.
He thawhdunna thuthlung hnuaiah hian Mizorama zirlai, higher secondary school chinte chuan an zir zel dan tur chungchanga kaihhruaina an dawng thei dawn a. Advancing North-east portal kaltlangin hriat tur pawimawh an en thei ang. School tin atangin zirtirtu ruat bikte kaltlangin zirlaite kaihhruaina hi kalpui tum a ni.