House-a House leader thil sawi thaireh leh turin AAP-in ngen

Tunhnaia Assembly House-a House leader-in mimal thil lutuk leh thu mu hnu a sawichhuak chu tha lo an tih thu Aam Aadmi Party chuan an sawi a. Thaireh tura Assembly speaker ngen an tumnaah hmaichhanah a lo hmu thei lo tih an sawi bawk.
AAP Mizoram president Andrew Lalremkima Pachuau chuan, State Assembly Session chu tunhnaiah mipui, a bikin thalaiten an ngaihven tawh em em a; mipui aiawha thlanten zahawm tak leh rilru seng taka ro an rel chu an bat a ni tih chu mipui ngaihdan a nih laiin, House leader berin MLA Pu Robert Romawia Royte-in kohhran thawhlawm a thawh zat elsen taka a sawi chu tha an ti lo hle tih a sawi.
“He thil hi tu chungah mah thleng lo se kan duh avangin he ngenna hi kan siam a. Thawhlawm chungchang hi kum tam tak liam tawha thil thleng niin, zirtirtu tur leh zilh tur chu kan ni lo mai thei, keini aia experience nei tha zawk an ni chungin, ram rorelna sang bera mimal thil lutuka tawngkama inbeihna a awm leh thin hi thleng nawn tawh lo se kan ti a. House leader leh Pu Robert Romawia Royte te thusawi kha House proceedings atanga nuai reh (expunge) turin kan ngen a ni,” a ti.
Assembly chu state mipui aiawha thlantlinten ram tana an rorelna hmun sang ber a nih avangin House chhungah thudik ziktluak lo leh finfiah tlak loh chhakchhuak lo turin chief minister, minister leh MLA-te an ngen tih AAP president hian a sawi a. House-a an thut dawnin Schedule 3 of India Constitution hnuaiah dawt sawi ngai lo tura an intiam ang taka awm turin an ngen tih a sawi.
Tun Assembly Session-ah tho chief minister-in kuhva chin khap a nih chungchang a sawi pawh, hetiang dan hi a awm a nih chuan tuin nge he dan hi siam a, tu nge a sawitu tih chiang taka sawi ni thei se an duh tih a sawi.
House leader leh sawrkara thuneitu berin RTI rintlak loh thu a sawi pawh mak an ti a. Sawrkar official-te a ring zo lo nge, official-te nena an thawhhona a tha lo zawk tih zawtin, “RTI ber a rintlak lo a nih chuan mipuiin khawiah nge sawrkar hmalakna hrechiang turin zawhna kan zawh tak ang,” Andrew Lalremkima hian a ti.
Hmunphiah hralh chungchangah agreement enin Vai hming a chuan loh laiin, hnamdang hoin an lei duh loh vanga a hralhnaa buai ta nia puh an ni leh si tih AAP Mizoram hian an sawi a. “Assembly House chhungah hian thudikin hmun chang se kan duh a, research base-a thil ti nia insawi hi an research a rintlak tawk lo niin kan ngai a ni,” an ti.