HSSLC result chhuakah lawmthu sawi
Mizoram Board of School Education-in Higher Secondary School Leaving Certificate Examination 2026 result a tihchhuah takah pawl hrang hrangin thuchhuah siamin lawmthu leh lawmpui bakah fuihna thu an chhuah.
Central YMA chuan, MBSE-in HSSLC result tluang taka a ti chhuak thei leh a hun taka result chhuah a nih theihna tura thawktu MBSE chungah lawmthu a sawi a. HSSLC result chhuakah a pumpuiah 87.67% in hlawhtlinna an chang chu lawmawm tiin, nikuma aia kumina pass percentage a sang zawk chu hmasawnna ropui tak a ni a, pass zawng zawng an lawmpui tih a sawi.
Zirlai hlawhtlinna chang zawng zawngte an zir zelna turah leh an hmalam hunah hlawhtlinna chang tura theihtawp chhuah turin an beisei a, duhsakna an hlan tih a sawi a. Tun tuma hlawhtling ve rih lote pawh hnual mai loa theihtawp chhuah a bei zui turin a ngen tih a sawi. ‘Kan ramah zirna-in hma a sawn zel theihnan theihtawp chhuah tlang turin Central YMA chuan mipui a sawm a ni,’ a ti.
Students’ Self-Support Union chuan MBSE-in HSSLC result tha taka a tichhuak chu lawmawm a ti a. Zirlai pass zawng zawng a lawmpui rualin, hlawhtlinna chang ve lote a tawrhpui a. Chutiang bawkin zirlai hlawhtlinna sang tak neihpui thei zirtirtute inpekna a fakawmin a lawmpui tih a sawi. Zirlai hlawhtlinna chang ve ta lo te chu beidawng mai loa, hmalam pan tang tang turin a chah bawk.
Kum 2025 aia kumina result a tha hret chu lawmawm tiin, zirlai, zirtirtute leh zirlai nu leh pate hei aia nasa lehzuala tan la turin a ngen tih a sawi a. Kumina zirlaiten hei aia hma an sawn theihnan nasa zawka tan la tura a ngen bakah zirlaite chu ramdang mite el phaka tan la lehzual turin a fuih tih a sawi a ni.
MNF Thalai Hqrs. chuan HSSLC pass tharte duhsakna leh lawmpuina a hlan a, hlawhtlinna chang zo ve ta lote chu beidawng mai loa, hlawhtlinna chang thei ngeia hmachhawn leh turin a ngen tih a sawi. MBSE-a thawktute thawhrimna fakawm tiin, zirna-in hma a sawn zel theihnan zirlai leh zirtirtute, thawktu zawng zawng theihtawp chhuah zel turin duhsakna a hlan tih a sawi bawk.