Huaisen leh langtlang takin sawrkar kalpui zel kan tum – Chief minister

Rilru thar nen mipuiin sawrkar thar an siam ang ngeiin huaisen, langtlang leh huapzo takin sawrkar a kal zel dawn tih chief minister Lalduhoma chuan a sawi. Ningani khan Mizoram Peoples’ Forum hruaitute chuan chief minister hi an kawm a. Sawrkar kal zel dan tura an thurawn a lo ngaihthlak sak.
Nitina sawrkar kal dan uluk taka lo thlir a, zirchiang a, tih dan tur tha zawk nia lang sawiho chu a tangkai em em tih a sawi a. State Project Monitoring Committee kal mek dan, tunhnaia hnathawh chhia media-a lang thenkhat thawktute chunga hma an lak dan, tender thenkhata sawrkar thutlukna siam dan, leiba chhawm an ngah avanga harsatna an tawh dan leh hma an lak zui dan, sawrkar laipuiin puk theih chin a siam chhungah chauh sum puk an tum thu, chumi atana inrenchemna lama hma an lakna, tunhnaia special drawing facility hmanga ni 5 emaw vel chauh an puk belh chhan chu state sawrkar tana a hlawk zawkna a awm vanga ti an nih thu, CBI chu ram dan tharin a phut ang thlapa general consent pek an nih thu te a lo hrilhfiah.
“Aikal pawh kan titawp dawn a, dan awmsa kan kengkawh ang. Chutiang bawkin Non Practicing Allowances pawh dan ang taka kal kan tum. Mipuiin rilru thar puin sawrkar thar an siam tawh a, huaisen takin, langtlang leh huapzo rorelna kalpui kan tum tlat a ni,” Lalduhoma hian a ti.
MPF general secretary Rev. Lalramliana Pachuau chuan kum chanve chhung lekin sawrkar hmalakna tha leh duhawm tak tak hmuh tur a tam avangin an lawm hle tih a sawi a. Tha taka ram inrelbawlna leh hmasawnna a kal zel theih nan, an pawl thiltumin a sawi angin, MPF-in a ngaihpawimawh thilte a hnena thlen an ni tih a sawi.
MPF hruaitu dangte pawhin, media hmanga inbeihna a nasa a, mipui kan phawklek fo nia an hriat thu an sawi a. Sawrkar sawiselna tam tak chu thu taka ngaih tlak loh, thu tling lutuk lo nasa taka vawrh lar luih an ni tih a hmuh theih tih an sawi rualin, fimkhur lehzuala sawrkar a kal a tulna pawh a awma an hriat thu an sawi. Sawrkar chu an thlawp a, an duhsak em avangin an vei zawng an sawi ve tih an sawi a ni.