Hulhliap SCC thawh 2-na tan dawn

Last updated Jul 21, 2025 5 0

Ruihhlo ngaite chhanchhuah tuma sawrkar, tlawmngai pawl leh kohhran tanhona – Hulhliap Shory Stay Centre chu vawiin – Thawhtanni atang hian a thawh hnihna tan a ni dawn a, a hmun ngai Sihphir Neihbawia Synod Revival Camping Centre-ah a ni ang.
Hulhliap Short Stay Centre-a lut hi ni 20 chhung an taksa, rilru leh thlarau hriselna atan enkawlna pek an ni a. Ni 15 chhung chu sawrkarin enkawlin a thlawn vekin, awmze neiin detox damdawi pek an ni a, mumal taka counselling neihpuiin, emergency atan doctor leh nurse bakah Police, Excise & Narcotics leh Home Guard ten an riahchilh a, nitin inkhawm pui thin an ni.
A tawp ni 5 chhung erawh Synod Revival Team-in gospel camping an neihpui a, Hulhliap an chhuahsan hnu ah pawh follow up pangngai taka kalpui a ni. Chhungtin hahna leh manganna hria in, family meeting pawh neihpui thin an ni a. Hulhliapa an awm laiin a mal te tea titi pui an ni a, anmahni duhthlanna ngeiin aftercare treatment (skill training) an thlang thei bawk a ni.
A thawhkhatnaah hian mi 150 enkawl tum an nih laiin, mamawhna avangin mi 200 chuang dahluh an ni. Engemawzat chu a tawp thleng loa tlanchhuak lehin, a tawp thleng hi mipa 105 leh hmeichhia 14, an vaiin 119 an ni.
A thawh hnihnaah hian mipa, ruihhlo (drugs) avanga harsatna tawkte bik tan ruahman a ni a, hmeichhia ruihhlo vanga buai emaw mipa emaw hmeichhia emaw zu avanga buai ang chi chu luh tir rih loh tura duan a ni.
Hetihlai hian tunlaiin Excise & Narcotics Department chuan Aizawl bakah district capital hrang hrangah chhun leh zanin ruihhlo ngaite vaiin beihpui an thlak a. Ruihhlo ngai thahnem tak hruaikhawmin an zilh thin a, an chhungte remtihna lak hnuah Home hrang hrangah an dah a, thenkhatte chu court thupek angin vantlang hmun pawimawh thenfai tir an ni.
Tunhnaiah Vaivakawn huamchhung Rangvamual leh a chhehvelah ruihhlo ti thin fuankhawm an tam avangin Aizawl West-II bialtu MLA, Excise & Narcotics minister Lalnghinglova Hmar leh Vaivakawn Siamtha Pawl hruaitute an thutkhawm hnu ah, heng lai hmun pawh hi Excise & Narcotics lamin an vil uluk thar a, July 18 pawh khan ruihhlo ngai fuankhawm engemawzat man khawmin a then home-a an dah bakah Hulhliap Short Stay Centre lamah an dah nual bawk.
Mizoram Presbyterian Kohhran hnuaia KTP pawhin ruihhlo do beihpui an thlak mek a, kumin July thla tir atang khan zana khawlaia ruihhlo ngai awmte ngaihvenin Street Ministry an kalpui a, December thleng a awh dawn a ni.