Kar khatah ni hnih khat tal inzawrh phalsak ngen

Kar khatah ni hnih khat tal inzawrh phalsak ngen
Aizawla mahni thlai thar zuar thinte chuan bazar chhungah thutna nghet siamsak theih an nih si loh chuan kawngpui kar khata ni hnih khat tal an thut ve phalsak turin thuneitute an ngen.
Mahni Thlai Thar Zuar Pawl inti chuan thuchhuah siamin, mahni thlaithar zuartu, thlai zawrhna hmun tur remchang tha zawk sawrkarin a la siamsak theih si lohte chu a pawng apuia bazar building chhunga an hnawh luh tel ve vek chuan an eizawnna nasa taka tihchhiat a ni dawn tih an sawi a. Hei hi India Danpui Article 21-na hnuaia khua leh tuiten dik taka kan eizawnna an kenkawhna kawnga an dikna leh chanvo (right to livelihood) palzutna a ni thei tih a sawi.
‘Kan pawl hi hmeichhe pawl a tih loh theih loh a, a chhan chu thingtlang atanga mahni thlai thar zuartute zingah hian mipa an awm mang loh vang a ni. Hei hian Mizo hmeichhiaten mahni tha leh zung seng ngeia ei bar zawn kawnga kan thawh hlawk zia a tichiang a. India sawrkar hian hmeichhiate eizawnna humhalh hi a dah pawimawh hle a, keini pawh sawrkar ngaihpawimawh zingah tel ve in kan inhria. Chuvangin hmun remchang kan hmuh ang anga kan nitin mamawh eitur thlai zawrhna kan kalpui mai hi ram mipui leh kan state sawrkar pawhin min humhalh pui se kan ti hle a ni,’ a ti.
Heng zawng zawng ngaihtuah hian bazar building chhunga hmun remchang tha an neih si loh chuan, kar khata ni hnih khat tal Aizawl khawpui kawngsira an thlai thar zawrh chu hriatthiampui a ngai lo thei lo, tiin, hetianga an eizawnna kawnga an dikna leh chanvo humhalhna turah hian an thiam ang leh an tlin ang tawka hma lak ve zel an tum tih an sawi a ni.