Human Rights Commission leh court sawi pawlh loh tha an ti

Human Rights Commission leh
court sawi pawlh loh tha an ti
Zofa Welfare Organisation chuan State Human Rights Commission din tuma sawrkarin hma a lak meknaah Commission hnathawh dan leh court thurel dan sawi pawlh loh tha an tih thu an sawi a. Ruihhlo dona kawngah pawh Commission hian a hranpaa harsatna a siam an rin loh thu an sawi.
Zofa Welfare Organisation (ZWO) hian Supreme Court thupek anga State Human Rights Commission (SHRC) din tura Mizoram sawrkar an lo nawr tawh dan leh, kum 2021-a High Court-a public interest litigation an lo thehluh tawh thu an sawi a. A tirah sawrkar hian sum indaihloh leh inrenchem chhuanlamin hmalakna chak tawk lo mah se, kum 2024-a Gauhati High Court chief justice-in na taka SHRC din tura a nawr hnu ah hmalakna a chak deuh ta a, tunah chuan Commission hi din niin chairperson leh member pakhat bakah officer leh staff dang nen, post 16 siam a ni tih an sawi.
ZWO legal adviser, advocate Rosalynn L Hmar chuan thuthar thehdarhtute zawhna chhangin, chief minister-in SHRC din chu ruihhlo dona kawnga hnawk thei dawn nia a sawi chungchang chu an lo hria a, pawi an ti tih a sawi a. Commission hnathawh leh court hna hriatpawlh loh a ngai tih a sawi.
Commission a taka a kal chuan, mihring dikna chanvo bawhchhiatna reng reng zualko theih a nih piahlamah hetiang avanga tuartu hnenah chhawmdawlna – rehabilitation leh compensation pek kawngah a pui dawn tih a sawi.
Commission chairperson tur hian chief justice hlui (chawl tawh) a ngai a, chumi atan chuan Mizoram hrechiangtu, tha tura an rin chu sawrkar hnenah ZWO chuan rawtna a thlen a, member atan pawh state civil service zingah rau rau, law (LLB) lam zirchhuak ngei dah an rawt tih Rosalynn L Hmar hian a sawi a. Hei hian dan hmansual theihna lakah Mizo khawtlang inkaihhruai dan leh ram dan lekkawhnaa thil inkalh awm thinah a puih an ring tih a sawi a ni.
ZWO hian Mizorama jail dinhmun tha lo lutukah pawh High Court-ah hian kum 2022 khan PIL an thehlut a. India danpuiin a phut ang leh Mizoram Prison Manual 2017-in a beisei ang hman loh tam lutuk vang a ni tih an sawi.
He thilah hian state sawrkar chuan sawrkar laipui atangin jail thawmthatna tur a dil thin a, centre hian hei hi chu state mawhphurhna a nih avangin puih theihna an nei lo, tiin an lo chhang pial a. Mizoram sawrkar chuan SASCI sum a dawn hmangin jail 8 tan cheng vaibelchhe 55 a ruahman tih ZWO legal adviser hian a sawi.
High Court-a PIL ngaihtuah hnuhnun ber, kumin July 16-ah SASCI sum hmanga Mizorama jail zawng zawng thawmthatna atan implementing department PWD kutah cheng vbch. 36.30 hlan a ni tawh a, contractor tur pawh an thlang fel tawh tih sawi a ni tih a sawi. Hetihlai hian court chuan fund pekchhuahna a rei tawh ang hu in, hnathawh mumal ala tam lo tih a sawi a. An hriat theih chinah District Jail pali – Lunglei, Siaha, Champhai leh Mamitah hna tan a ni tawh a; Central Jail bakah district jail dang – Aizawl, Kolasib, Serchhip leh Saitualah hna tan a la ni lo tih a sawi a ni.