Hun vawn dik…

Tun hnaia department pahnih hnathawh thlirletna hmanpuitu chief minister chuan sawrkar kalphung an duan tinrengah kalphung tha zawk an duang chho zel a, thil dik tihna tura dodaltute dim an tum loh thu te a sawi a. Hun vawn dik kawnga khauh zawka kal a nih tur thu leh, sawrkar hnathawkte chu mipui tana dawr theihna hun tam zawk nei tur leh dawr nuam zawk ni turin a chah/fuih bawk a.
Thu dik leh tha tak tak, ram hruaituten an sawi chhuah thin hi, a nihna tur anga zawm chu ni se, Mizoram state hi India rama state changkang leh hmasawn ber kan ni ang a, state hlim leh nuam ber ‘vanram tlafual’ tia sawi huai huai tham a ni tawh ngeiin a rinawm.
Hun vawn dik chungchang hi hruaitu lawk chinte hian an sawi fo a, an sawi hlimchhawn hun engemaw chen te hi chu a han pangngai ve viau thin a, hun a lo kal leh deuh a, a tlahniam leh hret hret a, sawrkar term khat a han zawh dawn hnaih hi chuan tu mahin hun vawn dik lam an vei leh tawh lova. Sawrkar thar a lo piang a, chief minister te, chief secretary te, chutiang zelin department hotute pawhin, an hnuaia thawk an staff-te hnenah ‘hun vawn dik’ chungchang an fah thar leh a. A hma ang bawkin sawrkar term tawp lamah hun vawn dik chu a zuih ral ve leh mai thin.
Tuna chief minister tharin hun vawn dik chungchang a sawi nachhan pawh, hun vawn dik a nih loh vang a ni leh mai a. ‘Khauh zawkin kan kal ang’ han tih leh mai hi chu a harsa lo maithei, mahse ‘a tih tak tak’ lai bera hi a har lai ber chu a ni. Eng pawh ni se, la bawhchhe tam ve lo sawrkar thar hruaitute hian bawhchhiat tur an lo sawi ve teuh hman mai em tih chu hunin a la rawn hril dawn a, mipui pawhin kan lo teh leh mai dawn a ni.
Hun vawn dik hi a tha reng mai, chu aia la tha leh chu, ‘hun vawn dik chhunga hna tak tak thawh’ hi a ni awm e. Hun vawng dik deuh si, pending ngah leh hle si te hi a awm theih awm e. Ni tin inhlawh chawpa eizawngte hian sawrkar hnathawk tam tak thawh ang hian thawk ve ta mai se, a ruaitu chuan an thawh hlawh a pe tha duh lo maithei a ni.
Hun vawn dik chhunga hna thawh dik hi kan mamawh tak chu niin a lang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More