Hunbi tiamin MNF-in MSCW chairperson bang turin an phut

Dan kalha Mizoram State Commission for Women chairperson leh member ruat chungchangah 2024 September 9 tlai dar 5.00 ral hmaa chairperson hi bang tur leh an inruatna hi sawrkarin sut turin an phut tih MNF party chuan an sawi.
MNF Legal Board hotute sawi danin, Mizoram State Commission for Women Act 2004 hnuaiah Mizoram State Commission for Women (MSCW) chairperson leh member dang 7 bakah member secretary ruat dan tur ziahlan a ni a. MSCW Act 2004 hnuaiah Rule siam niin, he Rules hnuaiah hian chairperson atan kum 65 pel tawh chu ruat theih a ni lo tih a inziak a ni.
ZPM sawrkar chuan kumin March 8 khan MSCW chairperson atan Pi Lalchhandami, Ramhlun North Aizawl a ruat a. Danin kum 65 tling tawh chu chairperson atan ruat theih a ni lo a tih laiin, sawrkar document hrang hrang, sawrkar hna atanga a pension hun record leh kohhran-a baptisma a chan hun record atanga a lan dan chuan, chairperson-a ruat a nih hian kum 68-na a hmang mek tih a lan thu an sawi a. 2021 kumtira Aizawl Municipal Corporation inthlanah Ward No.III-a ZPM ticket-a a din khan, 2021 January 10-a ama facebook page-a mipui vote tura sawmna a dahah pawh khatih lai khan kum 63 a nih thu a tarlang tih an sawi.
Heti a nih chuan MSCW Act 2004 hi sawrkarin a bawhchhe ngei tih a chian thu MNF Legal Board vice chairman Lalpianfela Chawngthu chuan sawiin, “Kumin March 13 khan Assembly House-ah chief minister Pu Lalduhoma chuan MSCW chairperson atan kum bithliah pel tawh ruat a nih dan hi thudik lo hmangin sawi mam a tum a. Vawiin thlenga dikna tungding zawnga ZPM sawrkarin hma a lak loh avangin kan auchhuak ta a ni,” a ti.
MSWC chairperson bakah member thar ruat danah pawh, member 7 ruat zinga pahnih chu kum over avanga bang tawh, a dang pakhat chu chhan dang vanga bang, member dang pakhat pawh a kum a over avanga bang mai tur a nih laiin, member pathum erawh an hun la tawp lo leh banna an thehlut lo chungin, bantirna thupek siam chuang loin sawrkar chuan kumin August 28 khan hriattirna hmasa luahlanin member thar 7 a ruat hnan tawp tih an sawi bawk.
‘Dan bawhchhiaa MSCW chairperson ruat mai duhtawk loa, member dinglaite pawh dan bawhchhia bawka midang ruat hnan an ni hi, a ruattu ZPM sawrkar hian kan hunbi tiam chhunga sut ve ve turin kan ngen a, kan beisei ang hma lak a nih loh chuan a tawp thlengin kan bawhzui dawn a ni,’ Legal Board vice chairman hian a ti.