Mizoram sawrkarin petrol leh diesel atanga chhiah lak a tihsan chu mipui tana tangkaia hman leh tur a ni tih Taxation minister chuan a sawi a. Sum mamawhna a san chhoh zel avangin tisang lo thei lo dinhmunah an ding tih chu mipui leh lirtheia eizawngten hrethiam a, harsatna siamsak lo turin a ngen tih a sawi.
Sawrkarin petrol leh diesel atanga Value Added Tax (VAT) – road infrastructure cess-ah leh social infrastructure services cess-a a tih san chungchangah Taxation minister Dr Vanlalthlana chuan, Mizoram Resource Mobilisation Committee rawt angin oil-a VAT rate tisang tura khauh taka department nawr an nih bakah Mizoram ruala petrol leh diesel man tihniamtu state dang pawhin an ti to leh tawh hlawm tih an hriat avangin rate thar hmang turin ngaihtuahna an seng a. Council of Minister-in pawmpuiin dan siamthat a ni zui tih a sawi.
“Petrol leh diesel atanga VAT tihpun hi thil harsa tak leh ngaihtuahna thui tak hman ngai a ni a. Nghawng a neih tur leh mipuiin harsatna an tawh theih tur thil tam tak ngaihtuah lawk niin, mipuiin thil man leh veivahna a to an hlauh hi ka tawmpui a. Chhiah tipungtu dinhmuna awm hi thil nuam lo tak a ni. Sawrkar dinhmun hrethiam chunga chhiah tihpun chhan min hriatpui turin ka ngen a ni,” a ti.
Oil-a chhiah tihsan tawp ai chuan mipuiin an hriatthiam zawk theih nan, tiin road infrastructure cess leh social infrastructure service cess an tisang tih minister hian a sawi a. Mizoram tan petrol leh diesel atanga cess lak hi thil thar ni mah se, state dang chuan hming chi hrang hrang hmangin an lo la reng tawh a. Mizoramah chuan a vawikhatna niin, VAT Rules pawh tihdanglam a ni tih a sawi a ni.
“Mizorama chengte hian chhiah kan pek tam loh avangin VAT rate tihsan tawp ai chuan a hmanna tur awmsaa chhiah tihpun hi a felfai zawkin mipui pawh min lo hrethiam hram turin ka ngen a. Petrol leh diesel man hi sang viau angin lang mah se, kum hnih kaltaa petrol leh diesel man aiin a la hniam zawk a ni,” Dr Vanlalthlana hian a ti.
Chhiah tihsannaah minister a nih angin a mawhphurhna ama kutah a awm tih a sawi a. Resource Mobilisation Committee-in rawtna a siam chu an thiam ang tawk leh mipui tana tha bera tura ngaih angin an kalpui a, petrol leh diesel man tlahniam zelin chhiah a tih tlem avang leh mipui tana hna thawk tura sum mamawh a san chhoh zel avangin chhiah tisang lo thei lo dinhmunah an ding tih a sawi a ni.
-- Advertisement --
Taxation minister sawi dang:
8 Kumin February 17 khan Mizoram Resource Mobilisation Committee atangin petrol leh diesel man tisang tur leh November 2021-a tihhniam a nih hmaa VAT rate (petrol 25% leh diesel 14.55%) hmanga chhiah la leh tura ngenna Taxation department-in a dawng.
8 Kumin July 2-a Council of Ministers thukhawmin petrol leh diesel-a VAT lak tihsan rawtna a pawm hnuah rules siamthat ngai siamthat a ni.
8 Road infrastructure cess hi Road Fund Act 2007 nen kalkawpa lak niin, kawng siamthatna atana hman tur a ni a. He thil hian kawng siamna atana sum tlakchhamna engemawchen a tihziaawm dawn bakah kawng siam hna thawktu, officer-te leh minister chenin mawhphurhna (accountability) sang tak a bel dawn. Kawng siam a nihin litre khata Rs.2 kan pek kan hrechhuak anga, tun aia ngun zawka kawng siam kan vil bakah kawng tichhe zawnga mimal, sumdawnna leh pawl thil dah thin pawh an inkiltawih sawt beisei a ni.
8 Social infrastructure services cess hi zirna in tihchangtlunna atan, hriselna kaihhnawiha hman atan, skill development leh hmeichhiate chawikanna (women empowerment) atana hman tur a ni a. He thil hian khawtlanga harsatna tam tak a tihziaawm ngei beisei a ni.
8 2021 November 4 khan petrol leh diesel chhiah hi Rs.7 a tihhniam niin, a chet hnuhnun ber tum a ni. Kum 2021 khan petrol leh diesel atanga chhiah lak hi 25% leh 14.55% ve ve niin, Rs.7 a tihhniam a nih hnuah petrol rate chu Rs.107.12 atangin Rs.101.30 ah a tla thla a, diesel pawh Rs.97.89 atangin Rs.86.37 ah a tla thla.
8 Petrol leh diesel man Rs.7 chiah chiaha a tlakhniam loh chhan chu, sawrkar laipuiin a man/basic rate a tihchet ve vang a ni). Sorkar hmasain petrol leh diesel a tihtlawm chhan chu sawrkar laipuiin petrol leh diesel man Rs.5 (petrol) leh Rs.10 (diesel) a tihhniam vanga state lamin tihniam ve tura a ngen bakah state thenkhatin Rs.7-a an tih hniam entawna tih a ni. Khatih laia central-in state sawrkarte tihniam tura a ngenna chu chief minister hmasa khan zahawm tiin a tihniam a ni.
8 Tunah petrol man hi Rs. 99.24 a tihsan a nih pawhin, kum 2021-a petrol man tihhniam a nih hmaa pek thin Rs. 107.12 kha Rs.7.97 in a la pha chuang loa. Diesel man hi Rs.88.02 a tih san a nih chuan kum 2021-a diesel man tihhniam a nih hmaa pek thin Rs. 97.89 kha Rs. 9.87 in a pha chuang lo.
8 Petrol leh diesel man hi sang vak angin lang mah se, kum 2021-a leina atana hman thin Rs.107.12 leh Rs. 97.89 nen khaikhin chuan a la hniam tho a. A nih theih chhan chu, tun hnaiah India-in crude oil a leina rate a tihhniam vang a ni ber.
8 Kum 2021-a petrol leh diesel man Rs.7 a tihhniam a nih khan lirthei chuan man leh thil phurh man a tlahniam chuang loa; tuna VAT pun leh chung pawh hian 2021-a petrol man tlakhniamna Rs.101.30 aiin tuna petrol man sang chho hi a hniam zawk (Rs.2.06 in) a, diesel erawh a man tihhniam a nih hnua a tlakna Rs.86.37 aiin Rs.1.65 in a to dawn.