Hungary rama Piastri hnehtu Norris
Hungary rama Piastri hnehtu Norris
Pathianni Hungaroring tlankawnga Hungarian Grand Prix-ah McLaren bawk an chungnung leh an an driver pahnih one-two finish hmuh tur awmin, championship hmahruaitu Oscar Piastri chuan a team-mate leh driver standing-a a hnuai chiaha awm Lando Norris hmakhalh zo loin pahnihna dinhmun a luah.
Pathumnaah Mercedes driver George Russell thlengin, Briton Russell hian intlansiak tawp dawnah pole position atanga tlan chhuak Ferrari driver Charles Leclerc a lehpel a; Red Bull reigning champion Max Verstappen chu pakuana a ni.
Tun kha Briton Norris tan F1 season kal laia vawi nga a chakna ni ve tawhin, intlansiak hnuhnung vawi lia a vawi thum chakberna a ni a, grand prix race chak tam lama a phak loh awmchhun Australian Piastri aiin race vawi khatin a chak tlem zawk a; championship standing-a a sang pahnihte inthlauhna hi point kua chiah a ni ta!
Pathianni Hungarian Grand Prix hnehna kha Formula One intlansiaka McLaren vawi 200 chak tlinna chiah niin, season kal lai race tum 14 an tlan tawha British team one-two vawi sarihna a ni nghal bawk.
Hungaroring track-ah khan hun tawp lam hnaihah Piastri chuan na zawkin a McLaren team-mate nawr bawk mah se Lando Norris khan Piastri ‘attack’ na zet chu a dang thei hram a, race chep leh inthlau lo taka Briton-in tlankawng a thunun tlat leh defensive drive pui tak a lantir tluanchhuak thei kha Pathianni race tiphurawmtu a ni ngei ang.
Norris hian opening lap-ah huai sen takin one-stop strategy a hmang a, panganaah hnufual hman mah se ropui taka beiletin hnehna a chang.
Aston Martin car khalhtu Fernando Alonso chu polesitter Charles Leclerc-a hnung chiah dawlin panganaah a thleng a; Sauber Brazilian rookie Gabriel Bortoleto chu parukna a ni.
Lance Stroll of Aston Martin chuan pasarihna hauhin, Racing Bulls driver Liam Lawson-a hma chiahah a thleng a; Dutchman Verstappen pakuana niin, Mercedes rookie Kimi Antonelli chuan point hmuh pahkna hniam ber 10-na a luah.
Seven-times world champion Lewis Hamilton chuan vawi riat ngawt chak ber nihna a lo hauh tawhna tlankawng Hungaroring-ah point a thawkchhuak zo lo a, a car vawn lai Ferrari chu 12-naah a thlenpui.