Hunpui atan Siaha inpuahchah

Siaha bawrhsap Lalhmunsanga Hnamte kaihhruaiin Krismas leh kumthar vuakveta venhimna kalpui dan tur sawihoin SP, executive magistrate, DTO bakah MADC-a RTO leh LAD bakah Mara Thalai Pawl aiawhte chu Zirtawpni khan an thukhawm.
Bawrhsap chuan Siaha district mipuiin zalen leh ralmuang takin hunpui hi lawm se a duh tih a sawi. “Mi awmtha duhlote avangin hunpuiah zalenna leh ralmuanna tha a awm lo palh ang tih a hlauhawm a, mipuiin nuam, zalen leh ralmuanga hunpui an hman ngei theih nan sawrkar official-te theihtawp chhuah turin ka chah a, khawtlang hruaitute tawiawmna tha ka ngen a ni,” a ti.
Halpuah, halmawi leh puakthei thildang, boruak tha lo siam thei leh ri bengchheng siam thei chi bakah naupang silai lem a mu hmang chi chu Siaha district-a lakluh, zawrh, hralh, hal leh hman khap turin district magistrate-in thuchhuah lo siam se, an ti a. Hemi bawhzuinaah hian khawtlang hruaitute, tlawmngaipawl aiawhte leh mipui thawhhona tha tak awm se an ti.
Zu leh ruihhloah Excise & Narcotics leh Police ten uar leh khawng zawkin hma la se tih a ni a. Hunpui chhunga venhimna tha zawk a awm theih nan SP leh MTP lamin duty-na hmun tur leh duty kalpui dan tur felfai zawkin ruahman se tih a ni bawk.
Hunpui laiin bazar a lun thin a, lirthei hun dan leh chetvel dan turah ruahmanna felfai a awm a tul tih sawi a ni a. Hemi kawngah hian DTO, Traffic Police leh MADC-RTO, LAD lam ten sawihoin ruahmann siam se an ti a ni.