Hunpui her liam hnu ah jail tang pun belh hret

Hunpui a liam hnu ah jail tang an pun belh hret a, a punna erawh a tam lo.
Mizoramah jail hman mek 10 a awm a, pathum hi Aizawla awm niin, jail tawt ber ber an ni bawk. Central Jail Aizawl hi mi 480 len theihna a nih laiin tunah 834 an tang a, a leng thei zat aiin tang 354-in an tam. 2025 December 31 khan jail tang 820 an awm a, mi 54 hi damchhung tang tur niin, 259 hi court-in hrehawm taka tang tura a tih an ni a, mi 50 hi chu court-in hrehawm tak ni kher lo (simple imprisonment) hmanga tang tura a hrem an ni. A bak 457 chu court-in an chungthu a ngaihtuah lai an ni.
2026 January 6-ah chuan tang hi 834 an kai a, hetihlai hian simple imprisonment-a tang mi pahnih chu an tan hun tlakin an chhuak. Hrehawm taka tang tura court-in a chungthu a rel fel hi pakhatin an pun belh thung. Court-in an chungthu a ngaihtuah lai mek 472 an kai ta a ni. Hunpui vuakvet laia dan bawhchhia, luh belh an awm nual a ni.
Central Jail bakah hian Central Women Jail, District Jail Aizawl, District Jail Lunglei leh District Jail Champhai chu engtik lai pawha tang thei zat ruahman sa aia tang an tamna a ni bawk a. Chutihlaiin Central Jail ang em em chuan a tang thei zat bak tang hi an tam lutuk lo deuh. Hunpui a liam hnu ah heng jail pawh hi pun lam an pan hret hlawm vek a, an ni bakah District Jail Kolasib-ah an pung hlek bawk a, an ni erawh tang thei zat ruahman sa in an awh khat ngai lo thung.
January 6 thleng hian Mizoramah jail tang 1644 an awm a, mipa 1448 leh hmeichhia 183 an ni. Hmeichhe naupawmin an fate an luhpui naupang 13 an awm bawk a, an ni hi a lu nunga chhiarin ‘tang’ anga chhiar tel thin an ni.