Hunpui laiin power khaihlak vanga complain lut awm lo – P&E minister

Hunpui laiin kawlphethaa harsatna avanga department lama complaint lut a awm lo tih Power & Electricity minister F Rodingliana chuan a sawi.
Minister F Rodingliana hian Thawhlehni khan a pisa-ah a department enkawl pathum – Power & Electricity, Commerce & Industries leh Printing & Stationery hotute kum thar atan Pathian hnena inhlantharna a neihpui a. Hunpui liamta chhung khan mipuiin kawlphethaah harsatna an tawh lohnan theihtawp an chhuah tih sawiin, “Kum hmasa lamah chuan kawlphetha khaihlak avangin mipui lam atangin complaint kan dawng nual a, kuminah erawh hetiang complaint hi dawn kan nei lo,” a ti.
A bikin P&E department chu mi zawng zawng huap a ni a, thil hote vangin ram pum harsatna thleng thei a ni tih hria a, hmalam hun kal zel turah pawh theihtawp an chhuah a, tan an lak zel a tul tih a sawi a ni.
Hmasawnna hna chak zawka kalpui a nih theihnan sawrkar laipui atanga sum tam zawk hai chhuak turin theihtawp an chhuah dawn a, hemi atan hian inbuatsaihna pawh kawng hrang hrangin an kalpui tih minister hian a sawi bawk.