Hunthar leh Khawhai in semi-final an lut

CYMA leh Mizoram Volleyball Association te tangkawpin an buatsaih LBS Suzuki 23rd Inter Branch YMA Volleyball Tournament 2024 chu August 13, Thawhlehni khan mipa quarter-final khelh a ni a, champion tura rinkai Hunthar leh Khawhaiin semi-final an lut. Vawiin hian mipa lam an awl ang a, hmeichhe semi-final khelh a ni ang.
YMA Volleyball a champion lai Hunthar hian Volleyball a boruak nei lian thar tak, Pro Volleyball league team thar Khawbel an hmachhawn a, set hloh lova hnehna changin semi-final an lut.
Hunthar hian mi ngaihven hlawh Khawbel lakah an khel tha viau a, set thum an khelh chhungin harsatna lian an tawk lo. Set khatnaah hma an hruai fal viau a, an khingpui ten point 15 bak an hmu thei lo. Set khatnaah chungnung viau mah se set hnihnaah Khawbel an khel tha a, an inthlau ta viau. Set hnihnaah hian deuce khelh a ngai hial a, deuce-ah Hunthar an vannei zui leh a, set hnih an la zawn. Set hnih an hloh zawn hnuin Khawbel an zuaiin an nguai a, Hunthar hneh let turin theihna an nei tawh lo. Lal-Albert-a leh an nula/tlangval taima tak takte vanga ngaihven Khawvel hi Hunthar lakah hian 25-15, 26-24, 25-19 in an tlawm a, final an lut zo ta lo a ni.
Khawbel lakah awlsam taka an chak vangin Hunthar in Inter Branch YMA Volleyball a vawi li champion a, record thar siam an hnaih deuh deuh zel. YMA Volleyball-ah hian Hunthar leh Maubawk te chu vawi thum champion in champion tam ber an ni dun mek. Inelna neih mekah Huntharin semi-final an luh laiin Maubawk erawh chuan quarter-final an paltlang zo lo thung. Maubawk an tlak vangin Hunthar in record thar siam theihna hun tha an nei a, vawi hnih an chak leh thei a nih chuan YMA Volleyball; mipa intihsiaknaah vawi li champion thei hmasa ber an ni ang. Hunthar hian semi-final ah Chhinga Veng an hmachhawn zui leh ang.
Hunthar laka fiahna hautak hmachhawn tur Chhinga Veng hian quarter-final-ah inelna neih meka khel tha tak Tuikual North an hmachhawn a, set khat hloh chungin hnehna an chang.
Chhinga Veng hian Tuikual North lakah bul an tan tha viau a, set khatnaah an khingpuite hi point 12 bak an hmuhtir lo. Awlsam taka set khatna an lak hnuin set hnihnaah an khel tha chhunzawm a, awlsam pangngai takin set hnihna an la. Set hnih an hloh zawn hnuin Tuikual North an insiamtha a, tha zetin an khingpuite an bei let. Point inthlau lo tak chungin Tuikual North hian set an la a, inkhel boruak a nung thar.
Set thumna an hloh hnuin Chhinga Veng an khel tha zui viau naa an tawp lamah an chesual teuh hle. 24-20 laia hma an hruai fal hnuin an match point hmuh an harsat a, an khingpui ten point thum lai an hmuzawn a, an nihrual hman teuh hle. Hun pawimawh takah point hlu tak an hmu a, 25-12, 25-18, 23-25, 25-23 a hnehna changin semi-final an lut. Semi-final ah Hunthar an hmachhawn zui leh dawn a, inkhel hmuhnawm tak an phochhuah ngei a beiseiawm.
Thawhlehnia quarter-final hnuhnung berah YMA Volleyball a pahnihna ni mek Khawhai chuan YMA Volleyball a vawi thum champion tawh Maubawk an hmachhawn a, 3-1 a hnehna changin semi-final an lut a, Muana Veng an hmachhawn zui leh ang.
Volleyball a vul thar tak Khawhai hian YMA Volleyball a hnuhma nei tha tak Maubawk lakah bul an tan tha viau a, awlsam takin set khatna an la. Set hnihna leh set thumnaah Maubawk khel tha tulh tulh mah se inlehthalna lian thlentir tur khawpin a tawp an khar tha zo lo va, Khawhai hian 25-15, 25-20, 25-23 a hnehna changin semi-final an lut ta a ni.
Khawhai hmaa fiahna hautak hmachhawn turin Muana Veng chuan an khingpui Dinthar chu 25-22, 23-25, 25-20, 25-18 a hnehin semi-final an lut ve bawk. Semi-final hi Ningani chawhnu lamah khel a ni ang.
Vawiin chawhnu dar 12:00 atangin hmeichhe semi-final khelh tan a ni dawn a. Semi-final hmasa zawkah vawi sarih champion tawh ve ve Bungkawn leh Kanan an inhmachhawn dawn. Anni inkhela chak zawk zawk hian champion theihna hun tha an nei dawn a. Tu emaw zawk zawk hi an champion a nih chuan hmeichhe inelnaah vawi riat champion hmasa ber an ni ang.
Hmeichhe lama record nei tha pahnih Bungkawn leh Kanan an inkhelh zawh hian Armed Veng South leh Vaivakawn ten semi-final thawhhnihna an khel zui ve leh ang.