Hydel project-ah hlep nei reng chungin outsource an tum tlat – Lal Thanzara

Hydel project-ah hlep nei reng
chungin outsource an tum tlat
– Lal Thanzara
Small leh mini hydel project-ah hlep an nei reng leh department-in an ui em em chungin, chief minster-in hlan a duh tlat avangin Vai mi hausa hnenah an outsource dawn tih Congress hruaitu Lal Thanzara chuan a sawi.
MPCC president chuan small leh mini hydel project engemawzat chu Mizoram sawrkarin Delhi mihausa Gundan-a hnenah a enkawl turin hlan an tum tih a sawi tawh a, an hlan duh loh phah a rin laiin, vawiinah chuan hlan tumin hma an la la zel a ni tih report a dawn thu a sawi.
“Serlui hian megawat 12 a pechhuak thei a, kum 10 chhung khan Rs. 129,53,98, 000 a ni a, a enkawlna senso chu Rs. 51,39, 97,407 niin, hlep Rs. 78,14,00, 592 a ni. Heti chung hian Delhi Vai mihausa hnena outsourse an tum chhan hi hriat a chakawm hle.
Gundan Green Pvt Ltd hnena hlan a nih hun chuan kum khat chhung (2023- 2024) a power hmuhchhuah Rs. 18,05, 98,000 ah zaa 32 a pe let anga, chu chu Rs. 5,77, 91,520 a ni. Sawrkarin Gundan-a hnena a khilai tur chu Rs. 12,28, 00,680 a ni,” a ti.
Hetiang hi a ni tih department hotuten an hrechiang a, an ui em em niin Lal Thanzara hian a sawi a. Maicham Phase I leh II, Khawiva, Serlui, Tuipui nen hlep an neih dan sawrkarah an thehlut thlap chungin, chief minister-in hlan a duh tlat nia an lo hriat thu a sawi. “Hetianga Vai mihausa hnena a hlan hian sawrkarin heng hydel project enkawltua a chhawr P&E thawktute hi engtin nge an awm zel dawn tih pawh ngaihtuah tham a ni,” a ti.