Hyundai bak pawh US-in sumdawnna hmun dap zel dawn

Hyundai bak pawh US-in sumdawnna hmun dap zel dawn
President Donald Trump-a sorkar chuan ram dang mi dap chhuah beihpui an thlaka Georgia-a Hyundai hmun dapa mi tam tak an man hnuah sumdawnna hmun dangte pawh an dap zel dawn tih White House hotu sangin a sawi.
CNN-a ‘State of the Union’-in an kawmnaah White House border czar Tom Homan chuan sorkarin hnathawhna hmunte a thlithlai uluk dawn tih a sawi.
“Hnathawhna hmuna thawkte lakah dan kengkawhtuten beihpui an thlak zel dawn,” a ti a. “An rilru that vang ringawtin tumahin dan lova he rama awm hi an chhawr tur a ni lo. Rim taka thawk thei leh hlawh tlem zawka an chhawr theih avang chauhvin US khua leh tuite aiin an chhawr a,” a ti.
Trump-a sorkarin an rama dan lova awmte dap chhuah beihpui a thlak hi duh lo an tam hle a. Lo neihna thil, damdawi in, khualbuk leh sa funna hmun ang chi US sumdawng lian tak takte phei chu dan lova an rama lutte chhawr tam ber ber leh an innghahna a ni.
US immigration thuneituten Ningania Hyundai hmun an dapnaah hian dan lova an rama awm mi 475 an man a, a tam ber hi South Korean an ni a. South Korean sorkar chuan Pathianni khan a tul ang thilte an tihfel zawhah heng mite hi an an hruai haw dawn tih a sawi.
US Department of Homeland Security erawh chuan hemi chungchang hi engmah an la sawi lo thung.
US Immigration & Customs Enforcement thuneitu pakhat chuan Zirtawpnia thuthar lakhawmtute a kawmnaah an mi man zinga thenkhat chu dan lova ramri kân leh visa a tawp hnua awm zui an nih thu a sawi a. ICE thuneitu dang pakhat chuan khualzin visa leh sumdawnga zin phalna chauh nei, hna thawh phalna nei lo tam tak an awm bawk thu a sawi.
Trump-a hian dan lova an rama awmte dap chhuaha thawn kir beihpui a thlak mekah Georgia-a mite hi dap chhuah an ni.