I-Day hmannaah a thusawi lai Health minister chau thut

Ningania Lawngtlaia Independence Day hmanpuitu Health minister Lalrinpuii chu Central YLA Playground-a zalenna ni champha thuchah a sawi tawp lamah a taksa a chauh deuh vangin a dinna atangin hruai thlak a ni a, Medical Team-in enkawl nghalin, Aizawlah helicopter hmanga phurh haw a ni.
Thudawn danin, Health minister hi a thusawi tur a duan sa, point 35 zingah point 33-na a sawi laiin a taksa a chauh deuh vangin fimkhur thilah thu sawizawm tir loin dawhsan atangin hruai thlak a ni a. Independence Day lawmna zawhfel thlengin ground-ah hian a awm a, programme zawh ve leh a thlenna Circuit House Lawngtlaia hruai niin, Medical Team-in an enkawl nghal.
A dinhmun hi hlauhthawnawm a ni lo tih official-te chuan an sawi a. Chawhnu dar 1:50 velah helicopter hmangin Lawngtlai chhuahsanin Aizawl a pan a, amah a ngaihtuahawm vang leh a hriselna dinhmun that loh zual vang lam niloin, lirtheia thui tak zinkawng zawh nghal tur chuan amah enkawltu doctor-ten an huphurhpui deuh vanga helicopter hmanga hawpui a ni tih an sawi.