I HAVE A DREAM

Mahmuaka Chhakchhuak

Martin Luther King chuan kum 1963 daih tawhah khan ‘I have a dream’ tih hi alo sawi tawh a, chumi awmzia chu ‘Kan ram tana hmathlir ka nei a’ tihna a ni thei awm e. Hetiang bawk hian Abdul Kalam chuan ‘A dream is not that which you see while sleeping, it is something that does not let you sleep’ tiin dream awmzia chu alo sawifiah tawh bawk a. Hei pawh hi mizo tawng chuan ‘Dream chu zana mumang lama kan hmuh hi a ni mai lo a, mutmu pawh tuah tha hleithei lo khawpa min siamtu zawk hi dream chu a ni’ tihna a ni thei mai bawk awm e.
Kum 1865 December 6-ah chuan America ramah zalenna dar khawnrik a ni a, chu chu mingo hoin mihang ho an awmbehna, chi inthliarna nasa tak awma, sal anga an chhawrna tihtawpna ni a ni. Amaherawhchu hetia sawi a awlsam ang maia thil thleng erawh a ni hauh lo a, a hnu kum zanaah ngei pawh nasa taka mihang hoin zalenna nei tura beih ala ngai fan a nih kha. Mihang zingah chuan hruaitu turin Martin Luther King a rawn chhuak nawlh mai a, ani hian America rama mihang (Negro) te zalenna turin a theihtawp a chhuah a, hnam zawng zawng leh chi zawng zawngte hi intluktlang vek kan ni a, America mipuite inkarah intluktlanna alo awm theihna atana Aug. 28, 1963 nia kawngzawh huaihawtna hmunah chuan hetiang hian thu a sawi a – Kum 100 liam tawhah khan Abraham Lincoln chuan helai hmunah ngei hian zalenna dar vuain chi inthliarna tihtawpna tura thuthlung chu a lo ziak fel tawh a. Chu chu mihang sal tam takte’n zalenna kan neihna tura thuthlung chu a ni. Amaherawhchu kum za dang kan hman leh hunah pawh mihangte chu kan la zalen chuang lo a, a ngai rengin hmuhsit leh rahbehna chu ala thleng reng a, ala danglam chuang lo a ni. Kan mamawh hi pek kan nih loh chuan kan hnam hi ala tlu rup dawn a, tun nipui boruak thengthaw nuama mihangho authawm hian favang hun a thlen hma ngeiin zalenna leh mi tin intluktlanna hi a auchhuak tur a ni tih tein nasa takin thu a sawi a.
Martin Luther King ang deuh bawk hian Abdul Kalam-a’n ‘Dream’ tih thumal a sawifiahna tawngkam hi sawi zau theih tak tur a ni bawk a. India 2020: A vision for the New Millenium tih lehkhabu phek 294 lai a ziah kum 1998 kuma tihchhuah kha lehkhabu namai lo tak a ni. He lehkhabuah hian ram changkang sawina pakhat chu ‘Developed Country’ tih hi a ni a. Developed Country ni ve thei tura India tana a ‘Dream’ hi lo chhiar ve ngei ngei la ka duh a che. Developed Country hnuai chiahah hian Developing Country an awm leh a, chutah chuan ram panga: Argentina, Guyana, Brazil, China-te awmin India pawh heng zingah hian a tel ve mek a ni. Kalam hian he lehkhabuah bung hmasa berah hian ‘Can India Become a Developed Country’ tih thupuia hmangin India chu Developed Country kan ni ve thei ang ngem tiin a kailawn tur thil chi hrang hrang a ziak a, sawi tur tam tak a awm nain heti chinah hian duhtawk mai rih ila. India ram tana a suangtuahna zawng zawngte hi a taka thleng thei vek a niin keimahni zawkin kan zir a, kan kalphung a dik phawt chuan kan hmabaka awm reng angin a ngai a ni.
He ka ram neihchhun, Mizoram tan hian suangtuahna leh duhthusam tam tak ka lo nei ve tawhin a tak ram thleng sela tia beiseina hrang hrang pawh kutchang thleh nghauh nghauh tham ka lo chhinchhiah ve tawh thin. Martin Luther King leh Abdul Kalam te ang ema ropui leh midangte hneh thei tur khawp erawh ni kher lo mahsela midang cho chhuahna atan leh tuin emaw hlawkpuina atan leh tangkaipuina atana an lo hman mial takin point khat lek han sawi ve ila.
Khawvel ram hrang hrangte bul tan dante an tlukchhiatna ata an thawh leh dante atang hian zir tur tam tak a awm a. A bik takin America ramin kum 1929 vela harsatna lian tak an tawh hnua an thawhchhuah leh dante kha a ngaihnawmin kha thawnthu khan thinlung pawh a hneh hle. Kum 1933-a inthlanpui a lo thlen lehah chuan Franklin Delano Roosevelt chu President a rawn niin America chhanchhuah lehna atana hmanraw pali WPA: Works Progress for Administration, CCC: Civilian Conservation Corps, SSA: Social Security Act, TVA: Tennessee Valley Authority a hman dan leh kum ruk hnua dinhmun pangngaia an din chhoh leh dante kha a ngaihnawm ngawt mai. New Zealand ram ngei pawh kum 1980 velah chuan nasa takin an tlachhiain an thawhchhuah aiin an hmanral a tam zawk a, sorkarin mipuite a enkawl dan ‘Spoon feeding’ chuan ram retheia a hruai thlen zawk ziate kha a lungchhiatthlak ngawt mai. Nimahsela kum 1984 alo thlen leh meuhah chuan Labour Party chuan sorkarna changin state rethei ber atanga MP thlan chhuah Roger Douglas, kum 46 mi chu Finance Minister a ni a. A ni chuan an ram economy tha lo tak chu a vei em em a, an tlakchhiat chhan pawh hmufiahin a inhre bawk a. Tuna kan kalphung hi siamthat a nih vat loh chuan a aia nasa zawkin harsatna kan la tawk dawn a, siamthata a awm chuan harsatna nasa zawk lo thleng tur hi kan pumpelh thei a ni tiin nasa taka tan la turin a mipui hnenah thu a sawi thin a.
Nimahsela ani pawh chuan a duh angin a siam tha hman lo a, a hmalaknate chu mipui chuan an thlawp loha an dodal zawk avang chuan hmalakna pawh a nei puitling hman ta lo a. Kum 1990-a inthlanpui a lo awm lehah chuan Labour Party chu paih thlain Conservative National Party chuan sorkarna an lo chang ta thung a. Sorkar tharah chuan Prime Minister chu Jim Bolger niin Finance Minister atan Ruth Richardson a ni bawk a. Mipui chuan a thlawna pawisa dawn leh beiseiin tlumtea thlir takin an sorkar thar chu an thlir a. Nimahsela sorkar thar chuan mipui beisei loh ang takin sorkar hmasa kalpui dan chu rawn chhawmin a hma aia nasa zawk mah chuan ruahmanna an rawn siam thar bawk a. Ruth Richardson hian kum 1990 – 1993 chhung Finance Minister niin kum 40 a nihin he nihna hi a chelh tan a. Ani chuan hma a han la tak tak mai a, khawng pawh a khawng tha bawk a, a hmalakna reng reng chu a kaw duak duak maiin a hriat a, kum 1994 a lo thlen meuh chuan New Zealand ram chu a rawn kang ta awk awkin an economy thanna pawh 6.2% lai a rawn ni thei ta hial a.
Ram dang chanchin pawh sawi tur ala awm, Japan ram tlukchhiat dan leh an thawh leh dante, German ram tlukchhiat dan leh an thawh leh dante leh Korea ram leh China ram thawh leh dante pawh thinlung hneh tak a ni. Kan ramah ngei pawh politics thilah hian harhthar lehna vawi engemawzat kan lo chang tawhin politics rahbi ngei pawh tum thum emaw lai kan lo rap tawh bawk a. Hnam dang leh vun rawng dang tel loa keimahnia rorelna fawng kan chelhna chin pawh kum 50 chuang emaw lai alo ni ta. Hetih chhung hian kan ramin a thlen chin pawh sawi ngai loin a hretu vek kan ni. State thenawmte’n min tlanpelh nasat tawh dan pawh sawi rik kher a ngai lo ang a, Patna khawpui thalaite leh Aizawl khawpuia kan thalaite nungchang danglam dan pawh kan sawi hman rih lo ni mai se. Vietnam rama kum khata vawi thum buh an thar dan leh khawvel huap pawha buh thawhchhuak tam ber pahnihna an nih dante pawh remchang danga sawi atan khek rih mai teh ang.
Party bil Politics hi mipui tan a thatna aiin that lohna a tam zawk thin avangin thlawp a hlawh tak tak thei ngai lo a. Hnam ropuite ngei pawhin an lo hnawl thin tawh a niin hnam tenau lamah chuan ala hluar reng a, Mizoram politics-ah phei chuan Mizo District Council hun lai atang tawh khan a hluar viaua hriat a ni a, vawiin thleng hian zung ala kaih nghet viau a tih theih. Chumi paih bo a, ti reh tur chuan mipui hian ‘Mi tha leh rin tlak’ kan thlanchhuah thiam a ngai tih hi a pawimawh ber pakhat a ni. Tin, party worker-te hi party-a mi tangkai ber ber an ni a, nimahsela an party ti hmelhem theitu ber an ni thei bawk. Chuvangin social media a ni emaw live ngei pawhin mipui ngaihzawn theih tura an awm thiam hi thil pawimawh tak a ni a, tute emaw kaihbu-a tang ringawt loin ngaihtuahna fim tak an neih hi a ngai thin.
|umkhat pawh Benjamin Harrison kha President (1889 – 1893) a nih laiin Theodore Roosevelt chu Commissioner of Public Civil Service a ni a, party mi leh sa induhsakna chungchangah hian an ngaihdan a inmil lo a, Theodore Roosevelt hi pa huaisen, dikna ngaina zet mi a ni a ‘America ramah hian thiamna rapbeta Party ringawt kan dah lal chhung chuan mi thiam kan nei thei ngai lo ang. Kan mi thiam neih chhun te pawh mipui tana tangkai turin sorkarah an lut thei ngai bawk lo ang’ tiin ngaihdan nghet tak a nei a, nimahsela President Harrison chuan chu ngaihdan chu a pawm thei si loh avangin a tawpah chuan Roosevelt chu Commissioner atangin alo ban phah ta hial tawh a nih kha.
Kan ram tan hian eng movement nge tha ber ang tih hi sawi thei chiah lo mah ila system nghet tak anga kan lo kalpui tawh ‘Party bil’ system paih bo hian nghawng tha zawk a neih theih ngei a rinawm. A nih leh chutiang tur chuan tunge hma la ang? Party worker tam takte hi chuan ram hmasawnna tura ruhrel din aiin mahni sahmim hnawh puarna tur an melh thin avangin an mit tihvaihin a awm tlat thin a, kum 1942 atang tawha kan ram leh hnam tana thil tha kan lo bawhpelh tawh dan atangin politics-ah hian mitvar hi alo har dawn hle mai tih hi a hriat tawh thin a, vawiin thlengin kan politics hi sakhaw puithiamte telna turah kan la ngaih loh phahna chhan pakhat a nih hi. Nimahsela politics bawk hi ram siamthatna kawng pawimawh ber chu a ni bawk si avangin politics hi hnualsuat ngawt erawh a rem hauh chuang lo ang.
Feb. 9, 2021 nia US President Donald Trump Impeachment vawi hnihnaa a awmna party (Republican) atanga senator 7-te chuan Democrats duh danin vote an thlak zawk kha mak kan ti mai thei e. Anni mi pasarihte; Richard Burr, Bill Cassidy, Ben Sasse, Lisa Murkowski, Mitt Romney, Pat Toomey leh Susan Collins khan mi tam tak ngaihdan leh kan ram politician tam takte ngaihdan angin an vawn tawh chu sahuai thing vawn tum tlat emaw a hniak tam lam zawng sela chuan Democrats lama vote thlak awm lo tak an ni a, nimahsela an chhia leh tha hriatna thiang tak hmangin an awmna Republican party lamah thlawpna an pe thei lo kha an fakawm thlawt. Chutiang bawka Oct. 3, 2023 nia House Speaker Kevin McCarthy paihthlak tumah pawh khan Democrats member 208 leh Republican member 8-te chuan paih tha an tiin paih \ha ti lo lamah hian Democrats lam a\angin vote pe an awm lo a, Republican a\angin mi 210 chuan paih \ha ti loin vote an pe bawk a. A awmna party Republican lam a\anga paih \ha tia vote pe tute chu: Andy Biggs, Ken Buck, Tim Burchett, Eli Crane, Matt Gaetz, Bob Good, Nancy Mace leh Matt Rosendale-te an ni a, heng mite hi kan ram hruaitute ni ta sela kan khaihlum duh ang nge chawimawina Nopui kan hlan zawk ang le?
Mizorama political party lo dintirh chhoh a\anga hun engemaw chenah kha chuan politics hi ala thianghlimin kan sakhaw rawngbawltute ngei pawhin an luhchilhin Rev. Chhuahkhamate, Pastor Zairemate, Upa Muka, Upa Chalhnuna leh Upa Zalawmate phei chuan politics-ah ring an rawlhin thuk tak thlengin ram tan rawngbawlna an nei a. Nimahsela ram tan tia politics tualzawla hun an hman mek lai chuan an telna tur nia hre loin kum 1950-ah chuan kohhran rawngbawltute chu politics-a inhman an lo remti ta lo a. Chuta ang chuan kohhran rawngbawltute chuan ram rawngbawlna lamah inrawlh vak tawh loin mahni seh seh mualah tiin kohhran chhungah emaw chauh rawngbawlna an lo nei ta a. Chutiang chuan vawiin thlengin kohhran leh political party chu an lo kalhrang ta a, engemaw changa thawhho tih chauh loh chu rawngbawl tlanna an nei tam meuh lo. Hei hi a chhan ni bera lang chu party ruihchilhna vang niin, keini hriat ve phak chinah ngei pawh party ruihchilhna thlarau hian mi a tuam hneh thei viau maiin a hriat a. Khaw eng hmu lo leka ruihchilh hi an lo awm chhunzawm zel bawk nen hian mitvar neih a har \hin hle a ni ngei ang. Hmasawnna rahbi rap tur chuan mit var neih a ngai a, ram kalsiam rel tur tak tak phei chuan color neih loh hial a lo ngai zawk \hin. Chutiang ngei chu ka lo suangtuah \hin a niin a tak ngeia thleng thei tur pawha ka beisei tlat chu a ni.