I kuttin a eng em?

Kuttin a en (yellow) deuh thut mai chuan a hrisel loh hmelin a tenawm thei deuh tlat mai. Mi kan hmuh a an kuttin a lo balh viau emaw a en deuh thut mai emaw chuan anmahni kan hmuhdan pawh thui takin a tidanglam nghal thei tlat a, chuvangin kuttin hi enkawl uluk a pawimawh hle a ni.
Kan kuttin a en hian a chhan chi hrang hrang a awm thei a, kan thil khawih vang te a ni thei a, chutih rualin taksa lamah eng emaw hrisel lohna kan neih vang te pawh a ni thei. Kuttin hian taksa chhunglam hriselna a entir te pawh an lo ti hial thin a ni. Tun tumah hian Times of India health section-in kuttin eng awm theihna chhan leh a enkawl dan tha ni a an sawi te kan rawn tarlang e.
Aieng khawih vang: Aieng hi kuttin tieng theitu pakhat a ni. Kutin chaw kan bar a, kan chawhmeh ah aieng a lo tel a, nitin maia aieng kan khawih chuan kuttinah a rawng a lo bet ve zel a, a rei hnuah kuttin var tha tak kha a rawng a lo danglam ta thin.
Soda: Soda hman nasat hian tin hriselna a nghawng thei. Soda hian natural bleaching property a nei a, thil rawng tak lutuk tih dak nan te pawh an hmang thin. Soda i khawih ngun viau chuan i kuttin rawng pawh a lo danglam thei a, tin a tither duh bawk.
Chemicals: Hmeichhia ten kan kuttin rawng kan hnawih a tireh leh nan remover kan hmang thin a, khawiah emaw remover man tlawm deuh a lo awm chuan a manto deuh aiin kan hmang leh zawk mai thin. Heng tin cheina leh a tihrehnaah hian chemical chak tak tak a awm thin a, concentrated acetone leh alcohol te a awm a, chu chuan tin hriselna a tha lo zawngin nghawng a nei thei a, tin rawng a tidanglam vek thei.
Taksa hrisel lohna: Taksa hrisel lohna eng emaw tak kan neih avangin kuttin a eng thei, a bik takin thyroid, psoriasis leh zunthlum avang te pawhin kuttin a eng duh hle. Hei bakah hian yellow nail syndrome an tih mai, lymphatic lam natna nei te hi an kuttin a eng nasa thin bawk.
Engtin nge i tih ang?
Kuttin eng tih rehna leh tin hrisel nan chuan a lo chhe tawh chu enkawl hmasak a ngai a. Kuttin chu regular taka sahbawn chak lutuk lo hmanga silfai a, coconut oil emaw almond oil emaw nitin hnawih tur a ni. Fungal emaw allergic reaction emaw i nei a nih chuan tea-tree oil hman a tha. Tea-tree oil hian antibacterial leh antifungal properties a nei. heng bakah hian keratin leh biotin tamna chaw- artui, omega-3 fatty acids, blueberries, almond, oysters, red meat leh avocado te ei tam a tha.
Hetianga i enkawl hnuah pawh i kuttin eng chuan ziaawm lam a pan thei lo a nih chuan doctor i rawn dawn nia.