Chanmari FC chu I League khel turin an tling ta a, I League season tharah Mizo club pahnih Aizawl FC leh Chanmari FC te an inlan thei dawn. I League-a Mizo club pahnih an tel tur hian Mizoram-ah football boruak a vawrh sang leh zual hle ngei tura ngaih a ni.
I League 2-ah pahnihnaa awm mek Chanmari FC hian inrinni tlai khan RG Stadium-ah an chunga awm Diamond Harbour FC an mikhual. Chanmari FC hi I League-a kaisang chiang tawh Diamond Harbour FC lakah an chak a nih chuan I League khel turin an tling chiang nghal dawn. Inkhel pawimawh tak a nih vangin he inkhel hi Mizo mipuiin an ngaihven a, a hmuna entu pawh an thahnem hle. Chanmari FC in hnehna chang a, I League-a an kaisang lawm tura mipui pungkhawmin beisei loh result an hmu a, Chanmari FC hi mak tak maiin an mualah an tlawm. Chanmari FC an tlawm vangin Diamond Harbour FC champion lawm lai Mizo mipui ten an hmu ta zawk.
Hnehna chan ngei tuma tan khawh Chanmari FC hian chawlhlawk hmain an khel tha viau a, goal pawh an thun teuh thei hle. Goal thun ngei tuma tan khawh Mizo team hian tum hnih ngawt goal post an pet per a, mikhual si nghal Sustana chuan save tha zet zet a nei bawk a, chawlhlawk hmain goal lut a awm thei lo.
Chawlhlawk hnu lamah inkhel a inthlak danglam hlawk a, Chanmari FC an hlauhawm thei meuh tawh lova, West Bengal club Diamond Harbour FC an hlauhawm ve ta thung. Chanmari FC in awmzet neia an khingpuite an nawr theih loh vangin mikhual team an vannei a, goal an thun ta nghe nghe. Diamond Harbour FC forward H Robinson Khongsai-a pet hlauhawm lem loh tak chu si nghak T Mawia chuan vanduaithlak takin a chhuah a, goal thun mamawh Chanmari FC in goal an chhuah. Player of the match a thlan zui tak Robinson Khongsai goal thun hi hun tawp thlengin an sut thei lova, an mualah uiawm takin an tlawm.
An hnuai chiaha awm Chanmari FC lakah an chak vangin Diamond Harbour FC hi umphak theih an ni tawh lova, I League 2 champion an ni. An mikhual Diamond Harbour laka an tlawm vangin hnual viau mah se Chanmari FC hi chanchin lawmawmin a deng zui thuai thung a, khelh khat khelh hmabak nei chungin I League khel turin an tling.
Chanmari FC hnuai chiahah hian point 25 hmu mek Sporting Clube de Goa an awm. Chanmari FC leh Diamond Harbour te an inkhelh lai hian Sporting Clube de Goa hi FC Bengaluru United nen an lo inkhel ve mek bawk. Chamari FC hnaih thei tura chak mamawh Sporting Clube de Goa hian hnehna an chang zo ta bik lova, FC Bengaluru United nen 1-1 in an inhnehtawk. Sporting Clube de Goa an chak zawh loh vangin Chanmari FC nen point liin an la inthlau a, Aizawl club hi an tan umphak theih a ni tawh lo. Sporting Clube de Goa tan umphak theih an nih tawh loh vangin Chanmari FC hi I League khel turin an tling a. Football-ah Mizo club ten bung thar kaiin, Tui let hnu lama a vawi khat nan I League-ah Mizo club pahnih an awm dawn.
I League khel tura Chanmari FC an tlin thu hi I League official chuan an page-ah an tarlang thuai a. I League champion hlui leh I League khel chhunzawm tur Aizawl FC chuan I League-a Chanmari FC an lawmna thu an tarlang a. Mizo mipuiten Chanmari FC an lawmpuina an tarlang nasa viau bawk. I League khel tura an tlin theihnana tha thawhtute leh an mahni tantu Mizo mipuite chungah Chanmari FC hruaituten lawmthu an sawi. I League-ah ngei Mizo club pahnihte inel hmuh a chakawm tawh hle.
I League khel tur Chanmari FC
Get real time updates directly on you device, subscribe now.