I-League khel zui tur Aizawl FC

I-League khel zui tur Aizawl FC
Aizawl FC chuan April ni 5, 2025 (Inrinni) zan khan an match hnuhnung ber khelin, RG Stadium, Mualpuia mipui 8,000 vel zet pung khawm hmaah sithum faiin Namdhari FC an hneh a, tlak hlauhawm karah an him leh ta hram a, season thar I-League lamah pawh Mizo team hi kan hmu chhunzawm leh dawn a ni.
Aizawl FC tan Lalrinzuala chuan goal hniha khung a, Namdhari FC defender Moro Lamine chuan box chhung mual veilam sir atanga Rinzuala cross tha zet chu a dang lut.
Inrinni inkhel tan hma thleng khan Namdhari FC hian point 29 neiin table-ah parukna an luah a, tla thei an ni tawh lo.
Aizawl FC erawh point 20 neiin table-ah 10-na an luah a, an chak zawh loh chuan I-League atanga tla thei dinhmuna an din avangin hnehna chan ngei tumin an bei a, phu takin anmamawh point thum hlu tak an hlawhchhuak zui ta a ni.
Mualpui stadium-a goal hmasa ber hi inkhelh tan atanga minute 13-naa lut niin, BD-a ball pek tha zet chu Rinzuala’n box chhungah lalutin, chiang zetin an goal hmahruai a thun.
First half tawp dawn minute nga la awmah box chhung mual veilam sir atanga Rinzuala shot tha zet chu Namdhari FC defender Moro Lamine chuan a danglut a, mualneitu team lamin sihnih faia hmahruaiin hun chanve an hmang zo.
Second half tan atanga minute 10 a ral hmain mual dinglam sir atanga BD-a ball pek chhe lo zet chu box-a awm Rinzuala’n goal-ah chantir lehin an goal thumna a khung a; Namdhari lamin an siphurh hi sut tumin nawrlet thin mah se hun tawp thlengin goal an khung lo a, Aizawl FC chuan sithum faiin hnehna an chang zui ta a ni..