I lu a na em? I ei leh in vang a ni thei!

Kan ei leh in vangin kan lu a na thei niin mithiam ten an sawi a, lu na emaw migraine emaw i nei a nih chuan, chutiang harsatna tawk awmchhun chu i ni lo tih inhre phawt teh.
Sinusitis, stress leh rilru hah vanga lu na chhuak thin te chu dahtha rih phawt ila, chumi piah lama kan hriat loh, kan lu tina thintu a awm a, mak i ti viau mai thei. Lunat pumpelh nan ei leh in lamah pawh fimkhur a lo ngai hle a nia.
Migraine chu luna chikhat a ni a, lu pangkhing a na deuh ngut ngut thin. Dietician Dr Sunita Dube chuan kan ei leh in vangin kan lu a na thei niin a sawi a, “Migraine hi stress tih lohah chuan ka ei leh in-in a tichhuak nasa ber a, migraines 30% zet chu kan ei leh in vang a ni. Hormonal change, mut that loh leh depression vang pawhin migraine hi a chhuak thei bawk. Mahse, kan ei leh in hi a percentage sang ber chu a ni,” a ti.
Luna thlentu tlanglawn tak pakhat chu kan ei leh in thlak thut hi a ni a, a bik takin calorie pai tlem chi chaw atana kan hman thut hian a lang chhuak duh. A awmzia chu thawklehkhata in-diet thut hian lu a tina duh tihna a ni.
Nutritionist Niti Desai chuan, “Kan ei leh in atanga carbohydrates kan tihbo thut hian lu na a siam thin a ni. Kan thluak hian carbohydrate chu hnathawh nan (fuel) a hmang a. Kan blood sugar a hniam pawhin lu a na thei. Tui kan in tlem lutuk pawhin lu a na thei,” a ti.
Tyramine chu amino acid a ni a, hei hian kan thluaka serotonin level a tihniam a, kan thisenzam a nzk buai a, chu chuan lu a tina ta thin niin an ngai a. Chuvangin tyramine pai chi chaw kan ei hian migraine/luna chu a rawn langchhuak ta thin a ni. Tyramine hi red wine, cheese, chocolate, zu telna in chi leh sa tin ang chi-ah te a tam niin an sawi.
Dr Dube chuan red wine hian tyramine, phytochemicals, phenols an tih mai a pai niin a sawi a, chu chu lu ti na tu ber niin a sawi bawk. Mithenkhat tan chuan zu telna chi reng reng kan in in, chu chuan migraine/luna a tichhuak ta thin a. Beer, whiskey leh wine-ah hian kan serotonin level tihniam thei compound a awm a, chu chuan migraine/luna a chawk tho thin niin an sawi bawk.