I thawk a rimchhe \hin em?

I thawk a rimchhe thin em?
Miin thaw uih min tih chuan nuam lo ve tak a ni ang, zah chem chemna tham a ni a, mahni inrintawkna kan lo neih ve te pawh a tichhe vek thei a nia. Chutiang a nih avang chuan ha nawh leh flossing (dental floss hmanga ha kar tihfai) te hi ka chhung enkawl nan a tawk mai kan ring a ni maithei. Ka chhung enkawl danah hian tih tur a tam ve riau a nia. Tun tumah hian thawk a rimchhiat loh nana mahni inenkawl dan tha ni a Times of India health section-in a tarlan te kan rawn chhuah chhawng e.
Engvangin nge thawk a rimchhiat thin?
A damdawi lam tawng chuan thawk rimchhia hi halitosis an ti a, thawk a rimchhiatna chhan ber pakhat chu ka chhung enkawl fai that tawk loh vang a ni. Kan ei leh in te, kan khawsak phung (lifestyle) te pawh thawk rimchhiat phah theihna a ni a, natna dang kai theihna pawh a ni.
Ei tur thlan uluk tur, hei hian thawk rimchhe tur nasa takin a veng thei. Thil rimna chi kan ei tam chuan thawk a tirimchhe duh hle a, purunsen, purunvar, zangtah, khanghu, thingthupui leh a dang te. Heng chaw te hi kan taksa tan thatna nei ve ngei a, kan ei chang a awm lo thei lo. Mahse, kan taksa atanga a chhuah hma chuan ha nawh emaw mouthwash hman emawin chung rim te chu a khuhbo mai mai thei lo.
Nunphung hrisel lo a awm a, nikhata ha nawh miah loh chang neih te, flossing tih ngai loh te hian ka a tirimchhe thei. A chhan chu kan thil ei nawi leh them te chu kan ha karah a tang tawk a lo awm a, chu chu bacteria inthlahpunna hmunpui a lo ni thei. bacteria te chuan ka chhung an tirimchhe ta thin a ni. Bacteria te hian hahni leh ha te pawh a tichhe thei.
Taksa hrisel lohna avangin thawk a rimchhe thei bawk. Ka chhung enkawl uluk hle chung pawhin thawk rimchhia hi awm thei a ni a, a chhan pakhat chu hahni natna vang a ni thei, hahni a thil bet thin hi hahni natna thlentu a ni deuh ber thin a, bacteria a lo insiam thuai a, chu chuan thawk a tirimchhe thin. Hei vakah hian ha nget, ka chhung yeast infection leh ka chhung ro xerostomia avangin thawk a rimchhe thei bawk. Ka chhung ro hi chil kawng (salivary gland) a dik lo awm vang emaw, hnar pin vanga ka a thawk a ngaih vang emaw te pawhin a awm thei.
Heng bakah hian thin leh kal that loh vang te, pneumonia leh bronchitis, sinus infection, diabetes, chronic acid reflux leh postnasal drip avang te pawhin thawk a rimchhe thei.
Engtin nge i tih ang?
Fennel seeds: Hnim chi khat fennel hi thawk tihrimtuina ti te pawhin an sawi thin. I thawk a rimchhia a i hriat chuan fennel seed tlem han thial la, i ka a thiang nghal vâk mai ang.
Ser leh serthlum kâwr: Ser emaw serthlum emaw chu a kawr silfai la, thial sawm rawh. Citric a pai a, chu chu ka rimchhia tihrehna tha tak a ni a, chil a ti tam thei bawk.
Lawngpar: Lawngpar hian antiseptic properties a nei a, chu chuan ka tirimchhetu bacteria a tibo thei.
Ha hnawh leh floss: Nikhatah ha vawi hnih tal nawt thin la, dental floss hmang thin ang che. Hei hian ka rimchhia a tiziaawm thei.
In entir thin rawh: Ka chhung hi enkawl that tur a ni a, ha doctor hnenah inentir fo tur a ni a, ha na emaw, hahni na emaw i nei lem lo a nih pawhin a khat tawkin inentir thin ang che.
Tui in tam rawh: Tui hian kan chil kawng a tihawng tha a, chuvangin nitin tui tam tawk in hian thawk rimchhia a tiziaawm thei.
Lei ziat fai thin rawh: Ha nawh fai a tawk mai lo va, lei pawh ziah fai thin tur. Lei-ah hian bacteria, fungi leh cell thi tam tak a awm thin a, chu chu tihfai loh chuan ka chhung tirimchhe thei a ni.