I thil lei a him tawk em? Plus Quality mark

Lallunghnema
Charity Lodge
Cont: 9862288182

Chawlhkár kal ta khan Electric Consumer – te leh Power & Electricity Department thlun zawmtu Mizoram Electricity Regulatory Commission bihchianna ka rawn ziak a. Kha Bihchiannaah khan MZERC tangkaina te, Power hman kawnga thu tâwp neitu a nihzia te, tariff bithliahtu a nih thu te, mahnia inrel bawlna hran nei, sawrkar thuhnuaia awm lo, Sawrkar inrawlhna piah lama hna thawk. Sawrkar khuah khirh theih loh thuneihna sang tak nei a nih thu tarlan a ni a. He Commission Pisa awmna address leh biak pawh theihnate chu sawiin Commission khaidingtu te ka rawn tarlang bawk a nih kha. He Commission hi mipui tana thawk an nih avangin mipui hian kan tana thawk na fam chu kan theihnghilh thiang lova, kan hnawl thiang hek lo. Electric Consumer-te zualkona theihna a ni.
Mizorama thil mak thleng reng chu, chhungkaw tin, mi tin, ni tin mamawh, a tel lova, tute mah awm theih lohna, mipui mamawh khawih che rengtu, Power leh Electricity kan hmel hriat tha duh tlat lo thin hi a ni. Thil mak dang leh chu, LPG ngaihsak lohna thinlung , PHE – Tui (water supply) zin kawng hriat that duh lohna ram, Mizoram a la ni zel hi a ni. Mizoram chu Mizo te chennna a ni e.
Tun tumah hian kan thil lei te a him tlanna tura Quality Mark chi hrang te leh a pawimawhna te kan sawi dawn a ni a. Ngun takin lo chhiar ula, in note buah te ziak lut ula, lo chhinchhiah ang che u. In chhungkaw tana pawimawh em em a ni si a.
He Consumer-te Khawvelah hian bungraw tha zawrh leh lei hi a laimu lai ber a ni a. Miin thil a lei chu a hringnun atan a him a tul a. Mihring hriselna atan a pawimawh a ni. Chuvangin sap tawngin han tarlang ila: “Know your Quality Marks. Ensuring Safe Purchase”, tih hi thil leina khawvelah hian a pawimawh lâwr lak a ni. Bungraw zawrh lai tam takah chuan Quality Mark hi dah (ziah belh) a ni thin a. Hei hi thil leitute (consumer) chuan an enin an chhiar ngei ngei tur a ni, an lei hmâ ngeiin. Quality Mark hi thil fûn emaw bungraw pâwn lamah chhut kai a ni thin a. Thil zawrh lai bawngraw chi hrang hrangah tarlan a ni thin.
Quality Mark chi hrang hrangte i lo zir chiang dawn teh ang:
1) ISI Mark: A hming pum chu Indian Standard Institution tih a ni. Eng nge a thawh (ensure) : Certification Mark a ni a. A pawimawh hle. Kan hriat awlsam theih nan kan Gas thuk (hot plate) te hi ISI Mark a ni tur a ni. Bureau of Indian Standard ruahman a ni. Thil siam (product) chuan mihring himna (safety) leh innghahna tlak, rin tlak a thlen ngei tur a ni. Electrical Appliances (eg.Pressure Cookers, Heater) leh Industrial Product (eg. Cement, pipes). – ahte hian ISI Mark a chuang tur a ni. A pawimawhna: Bawngraw tha lo leh chhia lakah ISI Mark awm lovin min vêng a ni.
2) AGMARK: Agricultural Product: Cereal, pulses leh oil ang chî te hi an thianghlim tawk em? Mihring hriselna atan an him tawk em? tih fin fiah a nih hnuah chauh AGMARK hi dah theih a ni. AGMARK hian ei – in lam thar chhuah heng khawizu, ghee, spices leh hriak lam te hi a tha em?, a thianghlim tawk em?A hrisel em? tih AGMARK hian a fin fiah thin a ni.
AGMARK chhinchhiahna a awm chuan ei – in tur pawlh dal leh pawlh chhiat te, tih chingpen (adulteration) te hi a thleng ngai lo a ni.
3) FSSAI Mark: A lam pum chu Food Safety and Standards Authority of India tih a ni a. Ei – in tur fun (packaged food item) entir nan: Snacks, diary siam chhuahah te (product) hian Quality Mark hi a awm ngei ngei tur a ni. Food Safety & Standards Authority of India hian Consumer-te himna tur uluk takin a ngaihtuah thin a ni. FSSAI Mark awm lo chu lei a him lo a, pumpelh hram tur a ni.
4) BIS Hall Mark: Thil siam chhuah (product) te chu FSSAI guideline angin buatsaih (processed and packaged ) a ni tur a ni. Heng ei – in tur funnaah te, snacks leh diary products-ah te hian BIS Mark a chuang ngei ngei tur a ni.
5) ECO Mark: ECO Mark pawimawhna chu a chunga kan sawi ei – in tur buatsaihnaahte hian a lang a, Food Safety Standards a keng tel ngei tur a ni. Quality Mark hi thil deh chhuah rintlak, innghahna tlak a nihna hi a ni a. Quality Mark chi hrang hrang kan sawi tâk te awm lohna chu bungraw him lo tihna a ni a. A pawimawh hle a ni. Consumer-te nun che vêl hi thil lei leh hmanin a khat a. Chuvangin kan sawi tâk Quality Mark awm miah lohna bungrua reng reng chu lei loh tur a ni a. Hman hauh loh tur a ni. Thil zuartute pawhin an zuar tur a ni hek lo. Mi tin kan fimkhur a ngai a ni.
Consumer-te hian vêngtu kan nei tha hle a. Keini pawhin kan inzir fin ve a ngai a nih hi!
I thenawma dawr te kha han check teh.
In Venga Pi Lali te thil zawrhah khan Quality Mark a awm em?