I vun a khawro em?

Vun ro tih chuan vun hnawng tha lo tihna a ni mai a, a bik takin vun inthuah epidermis hnawng tha lo a ni thin. Vun a hnawn that lohna chhan chi hrang hrang a awm thei ang. Tun tumah hian dermatologist Dr Sankeerth Vijayakumar, Bangalore-in vun ro leh a enkawl dan tha ni a sawi te kan rawn tarlang e.
Vun ro chu a tirah nasa vak lo a in]anin, a lo nasa telh telh thei a, engtik emaw chhung a daih thei bawk. Kum a lo upatin hetiang hi a awm tam duh lehzual. Vun ro chi hi awm ve hrim hrim a ni a, mahse, vun hnawn that loh vanga vun ro nasa lutuk hi enkawl a ngai a, enkawl that loh chuan harsatna chi hrang hrang a thlen thei thin.
Vun ro awmna chhan tlangpui:
1. Thlasik lai emaw, boruak ro lai emawin a awm duh
2. Sahbawn chak tak hmanga inbual emaw insil emaw ngun lutuk vang pawh a ni thei
3. Vitamin A tlakchham nasat vang a ni thei
4. Inbual nana tui lum hman than lutuk vang a ni thei
5. Eczema nei te vun a ro duh bik a, bacterial infection pawh an nei awlsam bik
6. Taksa chhunglam natna- hypothyroidism leh diabetes vang pawh a ni thei
7. BP tihhniamna damdawi ei nasat vang te, cholesterol damdawi ei vang te, arngeng damdawi ei vang te pawh a ni thei.
Vun ro symptom te chu:
1. Vun a thakin, awm a tinuam lo
2. Vun a inpawt mar deuh tung angin a awm
3. Inhiah deuh reng a ngai
4. Inhiahnaah a inrin var deuh a, a chang chuan inhiahna chu a phut deuh ang tepawhin a awm thin
5. Vun ro nasaah chuan chât khir leh vun khi chat te pawh te pawh a awm thei
6. Tifuh palh hlekah a pem/pilh hma bik
Engtia enkawl tur nge:
Vunro hi thil awm ve fo a ni a, enkawl pawh a harsa lo. Mahse,. vunro nasa lutuk chuan infection leh vun natna te pawh a thlen thei a, vun lam thiam doctor (dermatologist) rawn thin a tha. Tun tumah hian vun ro lo tura inven dan leh leh inenkawl dan tha ni a mithiam te sawi kan tarlang nghal e.
1. Vunro satliah chu lotion hmanga enkawl mai theih a ni a, lotion inchulh taimak deuh mai tur a ni.
2. Tui in tam a pawimawh a, sahbawn chak lutuk hman loh tur a ni bawk. Inbualnaa sahbawn chak lutuk kan hman hian vun hnawnna a tifai duak thei.
3. Vitamin pai tam chaw ei tam tur a ni- carrot, spinach, tomato, celery te hi vitamin A pai tam an ni.
4. Vun khawro tihreh nan natural oil hman theih a ni a, moisturizer pawh hman fo tur a ni.
5. Inbual nan tui lum sa lutuk hman loh tur a ni a, tui vawta inbual i thei ngang lo a nih pawhin tui lum pep pep chauh i hmang dawn nia.
Hetianga a inenkawlna chi hrang hrang i tih hnuah pawh i vun ro chu a ziaawm thei lo a nih chuan dermatologist i rawn dawn nia.