IAF-in Pak ramri hrulah nunchan zir tan
Indian Air Force chuan Notice to Airmen (NOTAM) tia hming vuah, liantham taka nunchan zirna chu Nilaini atang khan Pakistan nena inrina hrul, Rajasthan-ah a tan dawn.
Drill hi zing dar 09:00-ah tanin Zirtawpni zing dar 03:00 thleng awh tur niin ramri hnaih thlawhna tumhmuna thlawhna lut leh chhuak a awm dawn lo va. IAF hian ‘ruahman lawk ang training exercise’ an kalpui dawn a ni.
Thla hmasaa Pahalgam-a mi firfiakte chetna a thlen hnua India leh Pakistan inkar a chhiat mek laiin IAF hian inralrinna atan nunchan hi a zir dawn a ni.
Nilaini vekah khan ram pumah state hrang hrangten ‘civil defence drill’ an huaihawt bawk a, hei hi indona a thlen palha vantlang himna tur lo inzir lawkna a ni a. Hetiang hi kum 1971-a Pakistan nena an indo hnua an huaihawt vawi khatna a ni nghe nghe.
Civil defence drill-ah hian sipai hmun, eibar zawnna kaihhnawih hmun pawimawh leh vantlang hmun pawimawh himna atana hmalakna tur a ni bawk.
Prime Minister Narendra Modi chuan Thawhlehni khan National Security Advisor Ajit Doval a hmu leh a, hei hi tun hnai ni reilo te kar danah a vawi hnih hmuhna niin Delhi-in Pahalgam beihna chu sipai chakna hmangin a chhang let dawn ngei nia rinna a tilian zel.
Prime minister hian Defence Minister Rajnath Singh, Doval, Chief of Defence Staff General Anil Chauhan, Army, Navy leh Air Force chief theuhte a lo kawm tawh bawk.
IAF-in Pak ramri hrulah nunchan zir tan
Get real time updates directly on you device, subscribe now.