ICFAI University Miozram chuan Ningani khan an campus Durtlang North-ah International Seminar on Mizo Tobul Chhuina (Tracing the History and Origin of the Mizo People) an buatsaih.
Tribal Research Institute, Art & Culture department leh ICFAI University Mizorama Department of History leh Department of Mizo & Cultural Studies tangho buatsaih seminar hmanpuitu Art & Culture minister C. Lalsawivunga chuan Mizote hian kan nihna tak tak hrechiang turin kan paltlang tawhte hriatchian a ngai a. Thlang kan tlakna kalkawnga hnam hrang hrang nen kan inawmpawlh dan thlengin zir tur leh chhut tur a tam hle tih a sawi.
“Zohnahthlakten harsatna namen lo an tawk a, kan ram ngeiah pawh Zofate Inpui tiin an rawn tlankhawm a. Hei vang hian mi tam tak thinlungah hnam chungchanga harh tharna a thleng mek. Kan history chu ziaka inhlanchhawn ni loin, thua inhlanchhawn a ni a. Kan tobul ziaka dahthat enlet tur awm lo mah se, kan pipute sulhnu leh tobul, document awmna a hmun ngeiah kalchilh a, kan chhui chian a pawimawh hle,” tiin, rilru awn bik leh herlam nei loin kan historian-ten chhui se a duh tih a sawi.
Seminar hi nihnih awh tur niin, a ni khatnaah hian Prof. Jangkhomang Guite, Nagaland University hnen atangin “Myth, Legend and History : Recent Trends in the Study of Origin and Migration in Notheast India” tih thupui hmanga paper buatsaih ngaihthlak a ni a. Dr. Lalrinnunga Hmar, Mizoram University hnen atangin “ Early Migration of the Mizo People” tih thupui hmanga paper buatsaih ngaihthlak a ni bawk.
Ruahman lawk ang chuan vawiin – July 26 hian Mizo historian Laldova, Myanmar chuan “History of Chittagong Hill Tracts: A chhunga Zofate Chanchin” tih thupui a sawi anga; Liandova, Aizawl chuan “Hmasang Pipute Chanchin” tih thupui a sawi ang.
Seminar-ah hian Mizo Academy Letters, Mizo Writers Association, INTACH Mizoram Chapter, Mizo History Association, Zoram Research Foundation leh MZU-a Department of History & Ethnography bakah Mizo Department faculty leh research scholar leh ICFAI University zirlaite an tel.
Tunah hian ICFAI University-ah zirlai 400, teaching staff 60 leh non teaching staff 20 an awm mek.
ICFAI University-ah Mizo tobul chhui
Get real time updates directly on you device, subscribe now.
Prev Post
Next Post