ICT-in hnathawhna atan budget pawn atangin nuai 9200 nei – ICT minister

ICT-in hnathawhna atan budget
pawn atangin nuai 9200 nei – ICT minister
Information & Communication Technology department chuan state budget pawn atangin hnathawhna tur cheng nuai 9200 an haichhuak tih ICT minister Robert Romawia Royte chuan a sawi.
Aizawl Common Service Center Society chuan Thawhlehni khan Annual General Body Meeting an hmang a. He hun hmanpuitu I&CT minister chuan, an department-in state budget atangin cheng nuai 507.38 chauh nei mah se, thawktute hmalakna azarah budget pawn atangin hmasawnna hnathawhna tur cheng nuai 9200 an nei tih a sawi a. Mizoram sawrkar department-te chu state budget-ah chauh innghat loa, union budget-a hmasawnna sum awmte haichhuah kawngah tan lak thar a tul tih a sawi.
PMJVK scheme hnuaiah IT Development Training Center din na’n cheng nuai 690 sanction a nih tawh thu te, Village Knowledge Center 15 din na’n NABARD hnuaiah nuai 427.35 hmuh a nih thu leh VSAT hmanga tuam thar khaw 500-ah free wifi connection pek tum a nih thu te minister hian a sawi a. Changtlung zawka internet leh mobile connectivity pekchhuah a nih theihna’n khaw 79 chu OPGW – optical fibre network hmanga thlunzawm an nih tur thu sawiin, hemi atan hian nuai 5000 SASCI Part V hnuaiah hmuh a nih tawh thu leh State Data Center tihchangtlun nan SASCI Part IV atangin nuai 2250 hmuh a nih tawh thu a sawi bawk.
Common Service Center (CSC) ten mipui rawngbawlna hna hun rei tak an lo thawh tawhnaah Robert Romawia hian lawmthu a sawi a. Vantlangin zau zawka an hnathawh an hriat theihna’n tan la turin a fuih.
Mizoramah CSC 940 a awm mek a. Sawrkar kum liamta chhung khan transaction 116000 neiin, cheng vaibelchhe 26 an thawkchhuak. Sawrkar department leh bank hrang hrangte nen inthlunzawmin mipui tan service an pe a ni.