IIMC Aizawlah AI Pre Summit

IIMC Aizawlah AI Pre Summit
Ni hnih awh tur Artificial Intelligence (AI) Pre-Summit chu Ningani khan Indian Institute of Mass Communication (IIMC) Aizawlah tan a ni.
“AI leh Media” tih thupui hmanga AI Pre-Summit huaihawt hi India AI Impact Summit 2026 atan India ram hmun hrang hranga a bultanna tura buatsaih hmasak a ni a. IIMC Aizawla neih pawh hi IIT Bombay leh sawrkar laipuia Ministry of Electronics & Information Technology nena buatsaih a ni.
IIMC Aizawl regional director charge la mektu, IIMC Aizawl officer in charge (OSD) Nampibou Marinmai, IIS chuan AI Pre-Summit an thleng thei chu lawmawm a tih thu a sawi a. Summit hian ram hmasawnna tura AI hman tangkai dan leh chiang zawka hriat kawngah nasa taka a puih a beisei tih a sawi a ni.
AI Pre-Summit-ah hian Mizoram University Department of Mass Communication atangin Prof. Irene Lalruatkimi, MZU IT Department atangin associate professor Dr R Chawngsangpuii, IIT Bombay-a data manager Nitish Singh, The Frontier Despatch editor Adam Saprinsanga, marketing strategist Angela Roy, tech influencer Caleb Friesen leh IIMC assistant professor Dr Jharna Brahma ten AI chungchang anmahni hna leh subject hawi zawngin an sawi. MZU leh pawn lam atangin zirlai, research scholar leh AI kaihhnawih company hrang hrang atangin an kalkhawm a ni.
IIMC hi India rama media lam zirna hlun tak, Ministry of Information & Broadcasting hnuaia din niin Aizawlah chuan Mizoram University chhungah North East Regional Campus a awm. He zirna inah hian course pahnih – PG Diploma in English Journalism, kum khat zir leh MA in New Media Communications, kum hnih zir a awm a. English journalism-ah zirlai 20 leh MA NMC-ah zirlai 14, an vaiin zirlai 34 an awm mek.