IIT-Kanpur-in Delhi boruak chhia siam \ha dawn

The Indian Institute of Technology (IIT), Kanpur chuan Delhi leh a thenawm bul hnai boruak chhe lutuk chu mihring thiamna hmanga siam chawp-in harsatna an sut kian theih tur thu an sawi.
He boruak chhia avanga harsatna hi ‘Ruah siam chawp’ hmangin chhum atanga ruah sur tirin hri tha lo boruaka awm leh boruaka vaivut awm te an tihfai vek theih thu an sawi a ni.
The Economic Times-in a report danin IIT-Kanpur hian ruah siam chawp siam chhuak thei tur hian thil tihtur tul ngai apiang te lakhawmin kum nga a lo bei tawh a, July thla khan hlawhtling takin a lo enchhin tawh a ni.
Report-in a tarlan danin a buaipuitute hian sorkara thuneitute phalna a bik takin Director General of Civil Aviation (DGCA) atangin chhum atanga ruah sur tir phalna an hmuh tawh thu an sawi a ni. Amaherawhchu, a taka ruah siam chawp sur tir tur chuan khaw awm dan mamawh bik a awm a, chhum a awma boruak hnawng tha a awm leh thli a thawt that a ngai a ni.
He thil ti tur hian hmun hrang hrang atangin phalna lak a ngai a-DGCA te, Ministry of Home Affairs te leh PM venhimna lama mawhphurtu Special Protection Group atangtein remtihna lak hmasak a ngai a, Delhi khawpui chungah thlawhna thlawkin boruak thianghlim a han hip dawn a ni. Kumin September thla khan Delhi environment Minister Gopal Rai chuan Delhi sorkar-in thlasik chhunga khawpui boruak chhe tur ven nan chhum atanga boruak thianghlim ti chhuak turin ruahmanna a lo neih tawh thu a sawi ve bawk a ni. “IIT-Kanpur atanga mithiam ten ruah siam chawp an buaipui dan te an sawi a. A tak taka chhawr tangkai a nih theih dan tur leh sum leh pai mamawh a nih dan te thlengin min hrilh turin kan ngen a ni. A enchhinna chu CM awm lai ngeiin a ni ang a, a tak taka chhawr a nih theih dan tur pawh kan hre chhunzawm zel ang,” tiin Rai chuan a sawi.
Manindra Agrawal, IIT-Kanpur-a Professor leh he project-a a hnarkaitu ber chuan ruah siam chawp hian Delhi khawpuia chengten boruak thianghlimlo lutuk atanga an tawrhna lak ata kar khat chhung vel emaw chauh a chhawk theih dawn thu Economic Times chuan a sawi a ni.
Ni thum chhungin Delhi khawpui boruak hian ‘Severe Plus’ category vawi hnih a thleng hman a ni.