ILO mithiam ho nen eizawnna leh thiamna lama hmasawnna tur sawi

ILO mithiam ho nen
eizawnna leh thiamna lama hmasawnna tur sawi
Labour, Employment, Skill Development & Entrepreneurship department leh International Labour Organization (ILO) tangdun buatsaih, Mizote tana eizawnna leh thiamna lama hmasawnna tur sawihona, “Rountable on Employment, Skills & Social Protection” chu Thawhlehni khan Aizawlah neih a ni.
Hmanpuitu LESDE minister Lalnghinglova Hmar chuan khawvela pawl pawimawh ber zing ami, lehkhabu leh zirlaibu chauha kan lo hmuh thin, International Labour Organization nen Mizoram hmasawnna ngaihtuaha an thawkho thei leh sawiho thei chu lawmawm a tih thu a sawi a. Mizorama eizawnna kawnga harsatna hrang hrang, sawrkar hna indaihlohna avanga mithiam tak takin hna ngelnghet lo, informal sector-a an thawh nasat thu, ram danga eizawnna zawnga an vah chhuah nasat thu leh chu’ng mite tana innghahna tlak hna, him leh kumhlun tur ngaihtuah a pawimawh thu sawiin, ILO nena thawh dunna hian rah duhawm tak a chhuah a beisei tih a sawi a ni.
ILO deputy director Satoshi Sasaki chuan an hnathawh tlangpui a sawi a. Thiamna, hmasawnna leh eizawnna kawngah Mizo thalaiten theihna nasa tak an neih ngei a ring tih sawiin, ILO chu Mizorama mirethei leh mite ber thleng phak hmasawnna thlen tura an thiamna leh theihna hlanchhawng turin a inhawng reng dawn tih a sawi a ni.
Sawihonaah hian ILO atangin deputy director Satoshi Sasaki, senior specialist (Social Security) Mariko Ouchi, senior specialist (Employment) Radhicka Kapoor, specialist (Labour Migration) Catherine Laws, specialist (Skills & Employability) Gabriel Bordado, national project coordinator Radhika Sunger an lokal a, sawikhawmna hi panelist hrang zel awmin hun thuma then a ni a. College zirlai, entrepreneurs bakah sawrkar mi pawimawh thahnem tak an tel.