ILP lehzela inthlahdah…

MZP chuan kar kalta Inrinni tuk khan Aizawl khawpui chhunga ILP nei lo dap chhuah hna an thawk a, ILP nei lo mi 78 chuang an dap chhuak a; kum tling lo hnathawka chhawr engemawzat an hmuchhuak bawk.
ILP hmanga hung kan ni chung pawhin kan ram chhunga eizawnna hna tam tak, a ram leilung fate pawhin kan tih ve theih reng pawh hi, ILP neiho hian an thawk suau suau a, ILP hmanga inhung ni si hi, ILP hmang vek hian min chim pil mek leh tho dawn ni ta berin a lang. Chutih lai kara ILP nei lo heti zat zet tuk khat thingpui in paha dapchhuah tur an han awm thei mai hi chu, kan ram leh hnam himna tur ngaihpawimawhna lamah hian kan thawktute hi an pachhe ta viau em ni tih zawhna a awm thei awm e. Hlawh nei lo zawk ten an dapchhuak fo ta mai.
ILP nei lo manchhuah tur hi chu, englai pawhin han dap thut ila, engemawzat hi chu an awm thei reng dawn niin a lang. Heta tanga lo lang chiang tak pakhat chu, ILP nei mumal lo pawh hnathawka lo chhawr duhtawk an awm zel tihna a ni thei awm e. A chhan chu, hna thawk lova awm reng thei an ni bik lova, hna an thawh chuan a chhawrtuten ILP an neih leh neih loh an enfiah tur niawm tak a ni a, ILP nei lova hna thawk theia kan siam thin a nih chuan, chumi beiseia ramhnuai pilril atanga Mizoram lo luh ruk pawh an tan chuan a manhla tho dawn tihna a ni awm e.
System fel tak pawh hi nei mah ila, a kenkawh danin a zir leh si loh chuan awmzia a nei thei tak tak lo. Computerization te pawh kan sawi vul chuk a, RTI hmanga information han dil chang pawh hian, han click zeuha information lo lang nghal zung zung thei ve tawh awm taka hmanrua nei changkang tawhte pawh hi, a chang chuan thla khat chhung nghah ngaiin an awm tho. Chuvangin, system tha ringawt hi a tawk lova, a kenkawh that nen a inkawp tlat. Eirukna kan tih pawh hi, tuna kan system neih mek hi a nihna tur anga zawm ni se, heti em em hian a hluar hauh bikin a rinawm loh a ni.
Inner Line Permit hi miin an dil avanga englai pawha pek chhuah reng kan tum a nih chuan, ILP hmang hian hnam dangho hian min chimral tho ang. Chuvangin, permit a nih ang hian, pekchhuah danah chintawk nei a, bithliah fel tak siam a pawimawh dawn niin a lang.
Hetih rual hian, a ram leilung fate, abikin thalaite pawh hi kan inngaihtuah harh ve a pawimawh. Eng vanga kan ramah hian hnamdang hnathawk hi pung zel thei nge an nih tih chhut a, ILP nei lo manchhuah tur dap lama thahnem kan ngai ang bawk hian, kan ram leh hnam himna turin kan rama hna thawh tur awm ang ang kan thawh ve mawlh mawlh hi a pawimawh a ni tih hria a, thawh hreh nei lova kan awm a ngai; chu chu ram leh hnam hmangaihna tia kan sawi fo ‘nationalism’ chu a ni mai.