ILP nei lo/fel lo 68 man chhuak

ILP nei lo/fel lo 68 man chhuak
Mizo Zirlai Pawl, College Student’s Union leh Hnampual zirlai pawl hruaitute chuan inner line permit (ILP) tukin zing khan Aizawl khawpui chhung Kulikawn, Dawrpui (Bazar), Vaivakawn leh Bawngkawnah hnamdang (Vai) dan loa Mizoram lut leh awm mek an awm leh awm loh an endik a, ILP neilo /fello 68 manin thuneitute kutah an hlan nghal.
MZP hruaitute chuan, dan loa hnamdang (Vai) dapchhuahnaah hian kum reilote chhungin thil inthlak danglam tam tak a awm tih an sawi a. Vai hnathawk tura kal tam zawk hi Assam registration lirthei khalhin, licence neiloa khalh tam tak an awm a, Aizawl leh a chhehvela lirthei khalh an tam ta lutuk pawh an vei hle tih an sawi.
Hei bakah hian ILP-a inziak, Mizorama awm chhan (purpose of stay) nena inmil lo lutuka hnathawka awmte pawh tam tak man an ni a, Vai leh Vai in-sponsor 7 man an ni tih an sawi. Vai leh Vai in-sponsor awm hi mak a ti hle tih MZP chuan a sawi a. Hemi chungchangah hian sawrkar thuneitute pawh hma la nghal tur leh ILP pekchhuah kawngah a ti diklo tu an awm a nih chuan, chhuichhuaha hremna pek ngei MZP chuan an phut tlat tih a sawi a ni.
MZP chuan, hnamdang (Vai) ILP check chungchangah check chhung zawnga vengchhung leh check-na hmuna Traffic Police duty-te thlawpna avangin an lawm tih an sawi a. Sairang thlenga rel a lo luh tak avangin Mizo mipui harh thar a, mahni awm hmun theuhah ILP check uar tur leh kan chhawrte ngei pawh an felfai em tih ennawn fo turin a ngen tih a sawi a ni.