Imran Khan-an sorkar nena inbiak duh lo

Pakistan prime minister hlui Imran Khan chuan Shehbaz Sharif kaihhruai federal sorkar nena inbiakna neih an duh loh bur thu sawiin mahse sipaite nena inbiakna neih erawh an duh tia sawiin sipaite chu ram chhunga thutlukna tak tak siamtu tiin a sawi.
Case thahnem tak siamsak a nihnaah Thawhtanni khan Islamabad High Court (IHC) ah a inlan a, Pakistan tehreek-e-Insaf (PTI) party chairman chuan politicians, tuna rorel mek te pawh ‘tihtheih nei lo’ tia sawiin inbiakna nei turin thuneihna tak tak an nei lo a ti bawk.
Economy chungchangah politicians dang te nena inbiakna neih a tum em tia zawhna chu Khan chuan establishment te chu ‘thutlukna tak tak siamtu niin thuneihna tak tak nei tute an ni’ tia sawiin chu chu sipaite kuta awm vek a ni, tiin Dawn newspaper chuan a thusawi a tarlang a ni.
Hetih lai hian Pakistan Army chief Asim Munir thung chuan May 9 a ram chhunga buaina siamtute chu an phutawk hremna pek ngei a intiam thung a, khatianga ruahmanna felfai tak nena thil kalpui kha a thleng leh tawh tur a ni lo a ti bawk.
PTI chief chuan Army Chief General (retd.) Qamar Javed Bajwa chu hnunglam atanga beihah puh bawkin Khan chuan prime minister a nih laiin Bajwa chu tum thum lai ban theihna thil tihdik loh a neih thu sawiin mahse a insumkar zawk a ni tiin a sawi bawk.
Pakistan Army te hi thiltithei tak mai niin Pakistan mahni inrelbawl kum 75 vel chhunga a zahve lawih aia tam chu Army thuneihna hnuaia awm tawh niin tun thlengin security leh foreign policy thlengin sipai te chu thunei tak an ni.
Cricketer hlui politician a inlet ta Khan chuan phuba lak a rilruah a awm loh thu sawiin thuneihna a chang leh a nih chuan rule of law kenkawh a tum thu a sawi bawk.
Kar kaltaa Russian crude oil discount a leiin Pakistan ram a lut a. Khan chuan a sorkar khan Russian oil chu a man aia 40% a tlemin an lei a ti a. “Hei hi a chhanna chu em ni? Hei hi ka sorkar paihthlakna chhan chu em ni?” tiin a sawi bawk.
Thawhtanni atang khan nghahhlelh tak Russian crude oil chu Karachi refinery thlenpui a ni tawh a. Khan chuan a hun laiin thil dang zawng aiin economy a ngaihtuah tiin a sawi a.
Debt servicing chuan federal budget a khum a, economy chu default mai turah a awm tawh a, industry a tluchhia a, kum khat chhung lekin economic indicator-te a tlahniam a ni tiin a sawi bawk.
A sorkar hmaa sorkar chuan economy chhe tak a kalsan tia sawi bawkin a tum ber chu income generation, mega reforms kalpui a nia chumi tur chuan thutlukna liantham tak tak siam ngai a ni tiin a sawi bawk.
May 9-a Pakistan-a tharum thawhna nasa tak thlenga sipai tena chetlakna an neih hnuah Khan a party leader rual 100 chuang te chuan chhuahsan tawhin a then an bang bawk a, a thenin Istekham Pakistan Party (IPP) PTI chhuahsantu Jahangir Khan Tareen din chu an zawm san bawk.
Khan chuan amah chhuahsantu party hruaitu lawkte chu vanduai kara malsawmna zawk tia sawiin an party leader tin ten chhuahsan mahse ani erawh chuan a beih chhunzawm zel dawn tiin a sawi bawk.
Khan man a nih avanga PTI worker tena chetlakna an neihah military hmun leh sorkar building 20 chuang an suasam a, chung zingah chuan Lahore Corps Commander House, Mianwali airbase leh ISI building Faisalabad te pawh a tel a. Rawalindi a Army headquarter (GHQ) pawhin a tum khat nan beih a tawk bawk.