In sak tanpuina hmang thate hnenah PMAY-U Award hlan

In sak tanpuina hmang thate
hnenah PMAY-U Award hlan
Sawrkar laipui ruahmana khawsak harsate tana chenna in sakna tanpuina, PMAY – Housing For All hamthatna dawng zinga Mizoram atanga titha zual thlanchhuah mi pathum hnenah Thawhlehni khan lawmman – PMAY-U Award hlan a ni.
Award hlan tak hi sawrkar laipui ruahman – ‘150 Days Challenge’ hnuaia ‘Best House Construction Award 2021’ niin, mi pathum – Lalmuanpuii, Champhai; Lalramngheta, Kolasib leh Vansangliana, Mamit ten Mizoram atangin an dawng. Lawngtlai district-in ‘Best Performing Nagar Panchayat Award’ a dawng a; Best House Construction Award chu Lalhmangaihzuali, Lunglei; Rothanmawii, Kolasib leh RK Lianzuala, Kolasib ten an dawng bawk.
State Award 2023 chu Union Home minister Amit Shah chuan Aizawl Sipai Lammualah Solomon-a, Phunchawng leh Lalthanpuia, Hunthar Veng hnenah a lo hlan tawh a ni.
Award sem hmanpuitu UD&PA minister K Sapdanga chuan, sawrkarin chhawmdawlna a ruahmante dik taka hman chuan rah tha leh hlawkthlak a chhuah thin a. Tangkai zawk emaw tha zawka ngai a, ruahman loh anga tanpuina hmangsual tan a tawpah a pawi thin tih a sawi. Tuna lawmman dawngtute erawh dik taka an sum hmuh an hman avangin chawimawi an phu tih a sawi a ni.
8 Housing for All (Urban) hi India ramah June 2015 khan tlangzarh a ni a. Mizoramah kum 2015 atangin bul tan ve nghal a ni.
8 He scheme hi kum 2022 thleng kalpui tura ruahman ni mah se, 2024 December 31 thleng pawhsei a ni.
8 He scheme ah hian vertical 4 a awm a. Mizoramah “Beneficiary-led Construction” (BLC) – beneficiary ram nei, in sakna tur sum nei lo hnenah Rs. 150000 pek a ni. Beneficiary-in Rs. 50000 tala do let ve tura beisei an ni. Bank kaltlanga loan pek a, interest subsidy pek pawh kalpui a ni a, mahse hei hi central-in a titawp rih.
8 Mizorama census town 23 a huam a. BLC bikah hian census town 23 tan detailed project report 51 siam tawh niin, Ministry of Housing & Urban Affairs hnuaia Central Sanctioning and Monitoring Committee (CSMC) pawhin a pawmpui tawh a ni.
8 Census town 23-ah hian in 37244 sak tura ruahman a ni a. Chumi atan chuan project cost cheng vaibelchhe 744.88 dah a ni. Ministry atanga central assistance hmuh tura beisei zat hi vbch. 558.66 a ni. Mizoram khawpui 23 tana sum hmuh tawh hi vbch. 398.26 niin, za zelah 71.12 a ni.
8 Khawpui 23-ah in sak hna kalpui mek niin, beneficiary 36796 hnenah in sak tanpuina sum vbch. 394.47 sem tawh a ni. Tunah hian beneficiary 1st instalment hi mi 36796 hnenah pek a ni tawh a, 2nd instalment mi 25957 hnena pek tawh niin, 3rd instalment mi 5984 hnenah pek tawh a ni.