In tinin ruahtui dahkhawl tha ang u – Chief minister

Ruahtui tam tak dawng siin tui kan nghei lek lek fo chu in tinin a dahkhawlna tha neih a tul tih chief minister Lalduhoma chuan a sawi. World Bank suma din Mizoram Water Informatics Centre a hawnnaah chief minister hian sawrkarin tui hmang tangkai tura ruahmanna a siam tlangpui a sawi a. Mat Multipurpose Dam siam tum a ni a, Vapar rama multipurpose dam siam theihna tha tak awm chu zirchian niin, power siamna lam ruahman a ni tih a sawi.
Mipuiin ruahtui khawl uar a tul thu sawiin, “Furah pawh tui kan pump theih loh ni a thleng foa, ruahtui tam tak dawng siin tui kan nghei lek lek thin. Ruahtui dahkhawlna tha intinin neih tum ang u. Aizawlah phei chuan AMC-in ruahtui dawn khawmna nei lo tur chu in sak phal tawh lo mai se a tha lo’m ni, tih ngaihtuahna ka nei a ni,” a ti.
Data dik leh rintlak neih chu project rintlak siam tura kan mamawh hmasa a nih zel avangin, tuiah chauh ni lo thil dangah pawh data dik nei turin department-te a chah thin tih chief minister hian a sawi.
“Budget kan pharh pawhin data dik tak hmang turin thawktute ka hrilh. Kan lan danah kan lo tlahniam deuh a nih pawhin kan dinhmun dik tak hriat tluka hlu a awm lo. Data dik kan neih hian kal dan tur dik kan duang chhuak thei dawn a, data dik lo behchhana project siam chu dawt rinchhana thusawi ang tho a ni,” a ti.
Hmun 82 atanga tui data chi hrang hrang, darkar tina min hrilh hre thei centre changtlung tak din a ni chu thil lawmawm leh ram hmasawnna a ni tih Lalduhoma hian a sawi a. Tui lam data mamawhtu department leh institution-ten he centre hi ring tlangin, data thuhmun hmangin hna thawk se a tha hle dawn tih a sawi bawk.
National Hydrology Project hnuaia National Water Informatics Centre-in state zawng zawng mamawh a phuhruk zo loa, State Centre neih theih chu sawrkar laipui duh dan a ni bawk nen, centre din an remti ta tih a sawi a ni
Irrigation & Water Resources minister PC Vanlalruata sawi danin, water management lamah ruahmanna an nei nual a, tuihna tihpun dan pawh hmun hnihah an enchhin tawh a, a hlawhtling. Chumi method hmang chuan Tlawng tuihna tihpun an tum a, Bramaputra Board-ah project cheng vaibelchhe 70 chuang man an thehlut a, pawmsak an ni.
8 Water Informatics Centre hi Mizorama tui kaihhnawih hriat tur pawimawh zawng zawng hriat theihna tura ruahman a ni.
8 Lui tui luang zat, ruah tui tla zat, boruaka tui hu awm zat, lei hnuaia tui level leh sik leh sa lam data neih theihna turin hna a thawk ang.
8 Mizoram hmun 82-ah heng data lakkhawmna hmun hi bun fel vek tawh a ni a, centre-ah hian darkar tin data an rawn thawn thin ang.
8 Water Resources Information System leh Tuilian Warning System pawh he centre kaltlang hian siam a ni a. Chief minister hian Tlawng lui lian tur hriatlawk theihna hi a hawng nghal. DM&R department nena enkawl tur a ni.