Inbakkaih vanga thubuai awrh Chelsea leh Forest

Inbakkaih vanga thubuai awrh Chelsea leh Forest
Pathianni Premier League inkhel pakhata 1-1-a Chelsea leh Nottingham Forest inhnehtawk tum khan team pahnih player-te khelmual sirah an intibuai luih luih a, yellow card pathum pohawrh bak a hun laiin thununna lekkawh ni lo mah se Thawhlehni khan Football Association lamin team pahnih hi an player-te nungchang thunun lo thubuai a awrhtir a, vawiin, Ningani thleng hi insawifiahna hun a pe nghal.
Team pahnih player-te kha hun tawp hma minute hnih chiah awm tawhah an inbakkaih deuh nuai nuai a; Chelsea forward Nicolas Jackson khan Forest player Morato kha a beng niawmin a lang a, mahse, video assistant referee-in thil thlen dan a ennawn chungin Jackson lakah action lak a ni lo!
A hnuah Forest player Neco Williams chuan Blues defender Marc Cucurella kha khelmual pawnah a namchhuak a, chu chuan boruak a tisa thar leh a, Stamford Bridge technical area leh a chhehvelah an buai zui ta nuai nuai a ni. Chelsea head coach Enzo Maresca pawh a leiah a thu hnawk nghe nghe!
Khatia an buai thui deuh takah khan player pathum chu yellow card hmanga zilh an ni a, pakhat chu Forest player Williams niin, a dang pahnihte chu Chelsea lam mi Cucurella leh Levi Colwill-te an ni.
Hun pumin Blues player parukin yellow card an hmu tling a, season kal laiah match khata yellow card vawiruk emaw a aia tam emaw hi game hnih chhung an hmuh tlin tak avangin west London club hian dan awmsa behchhanin £50,000 an chawi a ngai zui ta a ni.
Referee Chris Kavanagh khan Pathianni match-ah belhkhawmin yellow card 11 a phawrh tling a, inkhelh ban hnu lamah FA lam an rawn inrawlh zui ta a ni.
Thahwlehnia Football Association thuchhuah chuan, “Minute 88-naah khan club pahnihin an player-te ve ve nungchang hloh tur an thunun zo lo a,” tiin an thubuai pek chuangchang an tarlang.