Inbengdai turin ram dangten India leh Pakistan an ngen

Inbengdai turin ram dangten India leh Pakistan an ngen
Nuclear ralthuam nei inthenawm ram hnih, India leh Pakistan chu an inkar boruak chhe mek karah ram tam takin inbengdaia inbiakna hmanga inpawh turin an ngen hlawm.
Nilaini tuk khan India hian Pakistan leh Pakistan awp Kashmir a kap.
India chuan chawlhkar hnih kal taa an awp chin Kashmir-a helhovin Indian 25 leh Nepali pakhat an thah phuba an lakna niin an sawi a. Pakistan chuan he thilah hian inrawlhna an nei lo tih a sawi thung.
Indian police chuan a beitu zinga pahnih kha Pakistani an nih thu an sawi a, Delhi hian Pakistan-in helho hi a pui niin a puh bawk a, Islamabad chuan a pha thung.
Khawvel ram hruaitu tam tak chuan ‘inbengdai’ tura ngenin an inkar boruak tha lo titawp turin an ngen.
“Khawvel hian sipai chakna hmanga India leh Pakistan inep hi a zo lo,” tiin UN Secretary-General António Guterres-a thupuangtu chuan a sawi.
Guterres-a hian ‘ram pahnihte hi sipaia an inelna chu nasa thei ang bera hnukkir’ turin a ngen tih as awi bawk.
UK Foreign Secretary David Lammy chuan boruak awm mek chu ‘ngaihven ngai tak’ a nih thu a sawi a. “UK sorkar chuan India leh Pakistan hi inbengdaia hmachhana indawrin, tha taka a tha zawnga hma lam pan turin a ngen,” a ti.
Lammy-a chuan, “India leh Pakistan-a ka thawhpuite hnenah he boruak hi kal zel pawh ni se tumah mahin hnehna an chang dawn chuang lo tih ka hrilh,” a ti.
Lammy-a hian inbeihna thlennaa British awmte chu ‘an ngaih pawimawh ber’ a nih thu sawiin UK foreign office pawh thil thleng ngaihven tha turin an ngen tih a sawi.
US President Donald Trump pawhin ‘zahthlak’ a tih thu sawiin ‘rang taka a tawp ka beisei’ tih a sawi.
China-a foreign ministry chuan India-in sipai chakna a hmang chu ‘a pawi’ a ti a. Foreign ministry thupuangtu chuan thil thleng mek chu ‘a ngaihven hle’ tih sawiin ram pahnihte chu ‘insumin, inbengdaia boruak tichhe zel thei ang zawnga che lo turin’ a ngen tih a sawi.
France-a Foreign Minister Jean-Noël Barrot chuan French chanchinbute hnenah, “India-in firfiakna lama inven him a tum hi tha ka ti a; mahse, India leh Pakistan hi buai zelna tur lakah insum turin ka ngen a, civil mite himna tur ngaihtuah turin ka ti,” a ti.
Iran-a Foreign Minister Seyed Abbas Araghchi chuan Delhi tlawhin India-a president leh external affairs minister a kawm a, Pakistani army chief leh prime minister te pawh kar tir lamah khan a lo kawp tawh bawk.
Iran hian India leh Pakistan inkara palai hna thawh pawh a inpeih.
India chuan Nilaini tuka a kahte hi ‘India beitu firfiakte awmna leh ruahmanna an siamna, ral an relna hmun’ niin a sawi.
Pakistan chuan hmun ruk kah a nih thu a sawi a, India chuan heng hmunte hi mi firfiakte hmunhma vek a nih thu a sawi.
Pakistani thuneitute chuan Nilaini tuka India-in a kahnaah hian mi 31 an thi niin an sawi a. Indian thuneitute chuan Pakistan-in laipui a kahah civil mi 15 an thi tel niin a sawi.
Pakistani sipaite chuan Inthian thlawhna leh drone panga an kap thla niin an sawi a, India chuang engmah a la sawi lo.
Pakistani Prime Minister Shehbaz Sharif-a chuan air force-te an lo inveng ve a, hei hi ‘kan lam atanga kan lo chhan let dan a ni’ tih a sawi.