Inbiak tum karah Ukraine-in drone-in Russia bei
Inbiak tum karah Ukraine-in drone-in Russia bei
Inkahhai a awm theih nana US leh Russia inbiak an tum mek laiin Ukraine chuan Nilaini zan leh Ningani zing khan Russia-ah drone tam tak thlawh luhtirin mi pathumin hliam an tuar a, chhim lam region pahnihah kangmei a chhuah phah a, pakhat hi tuialhthei thlitdimna a ni nghe nghe tih thuneituten an sawi.
Russian social media-a video thehdarhah chuan chhim lam khawpui, ramria inbeihna atanga km 470 vela hla, Volgograd-a tuialhthei thlitfimna hmun kang a lang nasa hle.
“Beihna avanga thil keh darhte chuan kangmei a siam avangin Volgograd oil refinery-a tuialhthei lak chhuah leh a buaipuina a tikhaihlak,” tiin Volgograd region Governor Andrei Bocharov chuan Telegram-ah thu a chhuah.
Russia-a Belgorod region Governor Vyacheslav Gladkov-a pawhin Ukrainian drone-in an region khawpui ber lailia car a fuh a, a kang a, mi pathumin hliam an tuar tih a sawi ve bawk.
Video a tar lanah car kang leh kawtthlera thil chhia keh darh vel hmuh tur a awm.
“Emergency service-ten an buaipui mek a ni,” tiin Telegram-ah hian a tar lang.
Ukraine chuan Moscow-in an ram an bei nia an sawi chungchang hi engmah an la sawi ve lo.
Russia-in thapuia February, 2022 atanga Ukraine a beih hnuah Kyiv hian drone hmangin ramri atanga kilometre 100 chuanga hla Russian hmun pawimawh hrang hrang an bei nasa hle.
Kyiv hian hetianga an beih hi Moscow-in ni tin missile leh drone hmanga civil mite a beihna chhan letna a ni a, dik lohna a awm lo tih a sawi.
Russian defence ministry chuan Ukrainian drone 44 chu Nilaini zan tlei tawh tak leh Ningani inkar khan an kap thla a, heng zinga pasarih chu kum 2014 atanga Ukraine ram an luahsak, Crimea peninsula chung zawnah a nih thu a tar lang.
Indona muala inbeihna nasa tak a awm mek lai hian inkahhai a awm theih nan US President Donald Trump leh Russian President Vladimir Putin te chu Alaska-ah an inbe dawn a. Hei hi kum 2021-a White House-a ram hruaitu pahnihte an inbiak hnua an inleh lehna hmasa ber tur a ni.
Trump-a leh Putin-a inbiak hi an ram huna Zirtawpni zan a ni dawn a, India hunah erawh chuan Inrinni zing lam a ni thung dawn a ni.