INC leh BJP in candidate puang
Kumin May 9-a Chakma Autonomous District Council member (MDC) inthlanpui bial 20-a neih turah Zirtawpni khan Congress leh BJP chuan Chawngte ah an party official candidate tur mi 20 ve ve an puang.
CADC-a INC candidate tur hi Congress MLA Lalrindika Ralte chuan a puang a. Politics-ah hnam leh sakhua a him tur a ni, tia sawiin, “BJP sawrkarin sakhaw pakhat tan a khel a. Chuvangin BJP chu kan sakhua theuh a him theihna’n kan hnawl tur a ni. Mizorama hnamtin tan Congress a ding nghet ber a. Tumah thlei bik a nei ngai lo,” a ti. Mahni hamthat duha hnam anga inhmuhsitna chawilian a, Chakma vote tel lo sawrkar din tum thu sawi chungin, tunah Chakma an en hran loh thu sawi thar lehtu party an awm tih pawh sawiin, he party-ah hian beisei tur a awm lo tih a sawi a ni.
India ramah Congress a sawrkar leh dawn tih Lalrindika Ralte hian sawiin, “Nakuma MP inthlan tur atan central-ah BJP paihthlak duhna a lian zel a. Tunhnaia inthlang mai tur Karnataka-ah Congress boruak a lian ber a, mipuiin Congress sawrkar thar hmuh hlan an nghakhlel hle,” a ti. Mizoram mipui tan Congress party-in sawrkar tha a pe thuai dawn tih a sawi bawk.
Chakma ADCa BJP president, MLA Dr BD Chakma pawhin Zirtawpni vek khan Chawngte ah an party candidate tur mi 20 a puang a. Ningani khan MNF chuan CADC inthlana an official candidate tur hi an lo puang tawh a ni.
INC leh BJP in candidate puang
Get real time updates directly on you device, subscribe now.
Next Post