India-a chatlak awm lova tuialh-thei thawn turin Russia inpeih

India-a chatlak awm lova tuialh-thei thawn turin Russia inpeih
Delhi-in US atanga Russian tuialhthei a lei tam avanga nawrna na tak a dawn mek laiin Russian President Vladimir Putin-a chuan ‘chatlak awm lova’ India-a thawn turin Moscow a inpeih tih a sawi.
Putin-a hian India a tlawha Indian Prime Minister Narendra Modi-a nen Delhi-a thuthar lakhawmtuten an kawmnaah US chuan Moscow atanga tuialhthei lei reng chungin engvangin nge India chu hremna pek a tum bik chhan a zawt.
President Donald Trump-a hian Delhi-in Russian tuialhthei leisaka Ukraine indona kal meka sum siamsaktua puhin a hrem nan Indian thil siam an lak luh chi hrang hrang tam zawkah chhiah 50%-in a laksak mek.
Putin-a’n India a tlawh mek lai hian US pawhin Russia leh Ukraine inkara inremna a awma indo a tawp theihna turin hma a la ve mek bawk.
Ningani tlaia India a luh hnu lawkah Putin-a hian Russia chuan indona muanawm taka a tawp theih nan hma a la reng tih India Today-in an kawmnaah a sawi a. Ukraine chu vauin Donbas atanga an inhnukdawk lo a nih chuan Russia-in tharumin a la dawn tho tih a sawi.
“He ram bial hi tharuma kan chhuah zalen a ni emaw, Ukrainian sipaiten an chhuahsan emaw a ngai dawn a ni,” a ti.
Modi-a hian Ukraine indonaah hian India-in tumah tan lam a nei lo tih sawn nawn lehin ‘muanna lam apiang a tang’ tih a sawi a, indona tihtawpna tura hmalakna chu tha a ti em em tih a sawi bawk.
Russia leh India inpawhna lo pung zel sawi chhuakin hei hi INdia-in ‘a ngaih pawimawh lian ber’ zinga mi a nih thu a sawi bawk.
Tun hnai hun eng emaw chen atang khan inkawmngeih tak thin, India-US inkar chuan a hniam lai tawngin bungrua inleisaka chhiah lak zat turah inrem an nei hleithei lo.
Trump-a hian India atanga bungrua an lak luha chhiah a lakluh chu 25%-ah a tipung phawt a, a hnuah Delhi-in Russian tuialhthei a leisak avanga hrem nan 25% dang a tihsan belh leh a. Indian chuan American sorkar chet dan chu ‘fair lo, dik lo leh chhan awm lo’ tiin a sawi nghe nghe.
India Today-in an kawmnaah Putin-a chuan India-in Russian tuialhthei a leisak avanga hremna a pek chungchang hi sawi chhuakin India pawhin US ang bawkin remchanna a nei ve tho tih a sawi.
“US hian kan hnen atangin an nuclear power plant atangin nuclear fuel a la lei reng a. US hian tuialhthei lei theihna dikna a neih chuan engvangin nge India pawhin chu dikna leh zalenna chu a neih loh bik?” a ti a ni.
Nikum khan Russia hi US-a nuclear reactor fuel hralh tam ber a ni tih Department of Energy atanga an data lak chu September thla khan Bloomberg-in a tar lang a. Uranium tihchak sa leisak khapna dan erawh May thla khan an siam thung.
Putin-a leh Modi-a hi Zirtawpni khan inkawmin kawng hrang hranga an ngaihdan an inhrilh bakah ram pahnihte sumdawnna leh lo neihnaa an thawhhona turte an sawi dun.
Modi-a chuan ni 30 chhung daih tur Russian khualzinte tana visa neih theihna tum hnih siam tur a hawng a, Russia-ah Indian consulate thar pahnih hawn a ni dawn tih a puang bawk.
Kremlin-in sum a tum, sorkar thununna hnuaia awm tur TV network, Russia Today chu India-ah Putin-ah hian a hawng ve thung bawk.
Ram pahnih hruaitute inkawm hian rem venhimna kawnga inremna an siam thu puan engmah a awm lo va; mahse, lawng sak, civil nuclear energy leh ram leilung hausakna thil vâng chi bika sum thawh dan turah erawh inremna an siam thung.
India leh Russia hian eibar dapna kawnga kum 2030 thawhhona tur programme an siam a. Hruaitu pahnihte hian hna huang zauh, thil inthawnna leh hriselna lam hawi industry-ah hei hi hman a ni dawn tih an sawi.
Putin-a chuan an ram hnih inkara sumdawnnaa sum che vek, $ tluklehdingawn 60 ni mek chu hun rei lo teah $ tluklehdingawn 100 a kai thuai a beiseiawm hle tih a sawi.
Modi-a chuan ‘energy chet lak lohna tura an thawh dunna chu a nghet a, India-Russia inkungkaihnaa a ban pawimawh ber a ni’ tih a sawi a, hei hi tuialhthei a ni tih erawh a sawi chiang lo thung.
Khawvela tuialhthei thlitfim loh hmang tam ber pathumna, India hian Kremlin-in kum 2022-a Ukraine a rûn atang khan Russia atangin tuialhthei a lei tam zual sauh.
Tun hnaiah US-in a hrekna an tawrh loh nan Indian company thenkhat chuan tuialhthei an lak luh an titlem tan mek thung.
Putin-a chuan India-a nuclear power plant lian ber din tumnaah Moscow-in a pui dawn tih a sawi ve bawk.
An inkawm zawha thuchhuah intawm an siamah hruaitu pahnih hian an thawhhona chu ‘tangruala thil zir bing leh tihchak lehzual tura tharthawh bakah ram venhimna kawng thar tha zawk duanna’ tur a nih thu an tar lang.
Putin-a hian Modi-a nen hian ram dang dawrna kawngah pawh thawhdunna tha tak an nei tih a sawi bawk.