India-ah Covid kai mek pung, 4,300 tling leh tawh

India-ah Covid kai mek pung, 4,300 tling leh tawh
India-ah Nilainia chhinchhiahna tihchhuah tharah Covid-19 kai enkawl lai mi 276 an awm belh a, a vei mek hi mi 4,302 an ni ta.
Ministry of Health & Family Welfare-in ni tina chhinchhiahna a tihchhuah thinah a hma darkar 24 liam ta chhungin mi pasarihin hri hi an thihpui a. Heng zinga pali hi Maharashtra-a mi niin Tamil Nadu, Delhi, leh Gujarat-ah pakhat theuh an thi bawk a, tun hnaia Covid leng thar lehah mi 44 an thi leh tawh a ni.
Gujarat leh Delhi chu darkar 24 liam ta chhunga hri kai hmuh chhuah thar an tamna ber niin 64 ve ve hmuh chhuah an ni a. Uttar Pradesh-ah 63 leh West Bengal-ah 60 hmuh thar an ni bawk.
Kerala chu hri kai la dam lo awm tamna ber ni mekin Maharashtra (510), Gujarat (461) leh Delhi (457) ten an dawt a. Arunachal Pradesh chu tun thlengin Covid kai la awm ve rih lohna awm chhun state a ni.
Covid kai an pun leh mek chungchangah hian Kolkata, West Bengal-a mi thiam, Dr. Arindam Biswas chuan, “Covid hi a awm reng a. A kai hi a changin an tam a, a changin an hniam leh thin a, engmah chiai chiamna tur a awm lo. A pawimawh ber chu invenna lam hawi thehdarh tam a ni a. Mipuiten sorkarin kaihhruaina a siam zawm thata hmai tuam a pawimawh ber rih a ni, a ti.
Kerala-ah chuan hri kai hmuh an pun hret hret avangin health department chuan sorkar leh mi mal damdawi inten an zawm tur inkaihhruaina thar a tichhuak.
Mock drill pawh a tul huna nei thei turin an inbuatsaih mek a. Damdawi inte chu Revised ABC Guidelines 03 an tih, June, 2023-a tihchhuah zawm tur leh COVID-19 kai leh tlang hri leng kaite enkawl dan tur kalphung an zam a ni.
He inkaihhruainaah hian puitling zingah thaw hleithei lo, awm na, khaw hmuh fiah lo, thisen hniam an awm chuan rang taka enkawl turin an ti a. Naupangah pawh khawsik sang, thil ei thei lo, thawk lama buai deuhte chu ngaihven ran turin tih a ni bawk.