Nilaini zan khan India chuan Maldives an hmachhawn a, ranking-ah an hnuai 36-naa awm lakah India hian 3-0 in hnehna an chang. An mualah an chak tumin India tana kir leh Sunil Chhetri chuan goal a thun a, ram tan a langsar nawn leh.
Shillong khawpui Jawaharlal Nehru Stadium-a International match khelh hmasak berah India in an mikhual Maldives lakah bul an tan tha viau a, inkhel tir teah goal an thun nghal teuh hle. Captain Sunil Chhetri siamsak atangin goal thun nghal teuh viau mah se an hun tha neih an hlah nghal tlat thung. An hun tha neih an hlah deuh mawlh mawlh hnuin minute 34-naah Brandon Fernandes corner chhuih tha tak atangin Rahul Bheke chuan chiang zetin a tauh goal a, hmahruaina goal a thun ta nge nge.
Hmahruaina goal an thun hnuin India an khel tha zui viau a, goal hnih an thun belh leh. India tan hian Liston Colaco chuan Mahesh siamsak atangin an goal hnihna a thun a. Liston Colaco hian ram tan a vawi khat nan goal a thun. India in si hnih faia hma an hruai hnuin ram tan inkhel tura kir leh Sunil Chhetri chuan minute 76-naah Liston siamsak atangin goal a thun a, an hmahruaina a tizau. Chhetri goal thun hnu hian goal dang a luh belh thei tawh lova, India chuan an mikhual Maldives lakah 3-0 ngawtin hnehna an chang a. November 2023 hnu lamah a vawi khat nan India hian hnehna an chang a. Maldives laka an chak hi manager thar Manalo Marquez hnuaia an chak vawi khatna a ni nghe nghe.
India hi Fifa ranking ah 126-na a ni mek a, Nilai zana an hneh tak Maldives kha Fifa ranking ah 162-naah an awm ve mek thung a. Ranking-a India san zawkna hi 36 zet a nu. Fifa ranking-ah an hnuai fea awm Maldives laka an chak hi inchhuanna leh chapo pui viau tur erawh a awm lo. Tlawm ai chuan chak hrim hrim erawh a tha tih thu a ni deuh mai thung. World Cup khel tur zawnna atangin India hi an tla fel tawh a. Asian Cup khel tur zawnna an hmachhawn zui leh nghal dawn a, fiahna hautak zawk an hmachhawn a ngai dawn. India hian March 25 khian AFC Asian Cup Qualifier-ah Bangladesh an hmachhawn zui leh ang.
Tarlan tawh angin India player ropui Sunil Chhetri chuan ram tan inkhelh a chawlhsan zet hnuin a kir leh a, Shillong-ah Maldives an hneh tum hian ram tan a goal 95-na a thun nghe nghe. Chhetri hi football khel mek zingah ram tan goal thun tam pathumna a ni a. A chungah hian Cristiano Ronaldo leh Lionel Messi te an awm mek.
Sunil Chhetri tel lova chak harsat India in Maldives lakah hnehna an chang leh ta hian India in Sunil Chhetri a mamawhzia tilang chiang leh zualtu a ni a. Kum 40 mi Chhetri hian Mizo player te a dip thin naa india erawh in a mamawh em em tlat si. Ram tan inkhel chawlhsan zet tawh chunga a kir leh pawh hian mak tih hlawh leh India hmachhawn loh zia tilang chiangtu nia ngaihna awm bawk thin mahse khelmual chhungah hruaitu ropui a ni tlat a. Mamawh laia goal thuntu pawimawh a ni tlat bawk si nen Chhetri nge nge tih nawn a ngai leh tho thin.
Maldives lakah Sunil Chhetri a vul lai hian Mizo player langsar Lallianzuala Chhangte chu hliam vangin a inlan thei lo thung.
India an chak, Chhetri a vul nawn leh
Get real time updates directly on you device, subscribe now.